Ka sorkar Jylla kum shi bynta ban iasnohkti lang biang bad ka ri India baroh kawei kala pynbeit ban don ka jingkynmaw burom ia kito ki briew kiba la aiti iala ka jong ka jingim na ka bynta ban pynioh jinglaitluid ia ka ri India bad kum ka dak jong kane ka jingburom ia ki, kan don ka jingsangehtrei ha baroh ki jait kam bad wat ka iaid ka ieng ruh hapoh 2 minit ha ka por 11:00 mynstep jong ka 30 tarik mynta u bnai.
Ka sorkar kala bthah ba hapoh katei kapor ba 2 minit naduh 11:00 AM haduh 11:02 AM baroh ki briew kiba dang don ha ki lynti iaid ne ki kam ba ki trei kin hap ban sangeh shwa bad sngap jar, ki kali ba iaid ha surok ruh kin hap ban ieng shisien don, baroh ki karkhana kin sangeh ka jingtreikam bad wat ka All India Radio ruh kan hap ban sangeh ia ki prokram jong ka hapoh katei ka 2 minit. Ha shwa ban sdang ia kane ka 2 minit kan don ka jingpynsngew ia ka jingriew jong ki ktang suloi lane da ka sairen.
La pynbeit ba kan don ka jingpynpah ia ka sairen kaba nyngkong ha ka por 10:59 haduh 11:00 AM bad hadien ka jingsangeh ne sngapjar ba 2 minit yn pynpah biang ia ka siren ha ka por 11:02 AM haduh 11:03 AM.