Ka Jaintia Students Union (JSU) Seng Kmie kum shi bynta ban pynpaw ia ka jingpyrshah halor ka jingbymioh rung klas ki samla pule ha ri Lum Jaintia na ka bynta ka class XI, kumta kila pynlong da ka jingiakhih kata da kaba shong kyllaiñ myngngor hajan Kiang Nangbah Govt. College Jowai kaba la sdang naduh mynta ka sngi.
Katba ki dkhot jong ka Seng ryngkat bad ki samla bym pat ioh rung klass, ha ka jingsynran lang ki kmie ki kpa, ki dang pynlong ia ka jingiakhih, na ka liang ki bor pyniaid District lyngba u Deputy Commissioner ula khot iakren ia ki ban weng ia kane ka jingiakhih bad ban pynioh rung klass ia kitei ki samla. Ha kaba na ka liang u DC ula ong ba na ka liang ka tnad pule puthi ka District School Education Office, ka la bthah ia ki skul sorkar ban pynmih ia ki stream kiba pher khnang ba yn lah ban thep klass ia kine ki khynnah samla ki bym pat ioh jaka.
Hynrei na ka liang jong ka JSU Seng Kmie kam sngewhun satia ia kane ka jingiakynduh bad u Deputy Commissioner, namar ka jingiakynduh ka long kaba lyngkot bad ka bym ai jingshai kaba paka. Kumta kila pynpaw ba wat lada u DC u kular ban pynioh klass ia kine ki samla hynrei ula dei ban ai da ka jingthoh ban pynshisha ia kane bad pynshai iabaroh ki jingdawa jong ka seng.
Lda ki bor District kim lah ban ai da ka jingthoh kaba shai sha ka Seng na ka liang ka JSU kala rai ba kan ym pat weng ia kane ka jingiakhih bad kan dang iai bteng haduh ba ka sorkar kan sngap ia kane ka jingdawa bad ban pynrung klass lut ia baroh kitei ki samla ki bym pat ioh klass haduh mynta.
[Kawei na ki khynnah bym pat ioh rung klass kaba la jaw ummat (iam) katba ka dang ai jingkren ha ka prokram jingiakhih ka JSU, ha nongbah Jowai]