Ka Seng Kur Bareh East Jaiñtia Hills District hynnin ka sngi 9 tarik u Jylliew kala lum ïa ka jingïalang ban ïamir jingmutlang halor ka jingjia ba sngewsih ïa ka (L) Pynchei Bareh, hadien kane ki dkhot kila leit hiar sha ïing sah jong ka ha ka shnong Jalaphet Bri Sutnga (Club Pyrdung), East Jaiñtia HillsDistrict.
Ïa ka jingïalang ha kane ka sngi la pynïaid da u President ka Kur u ma Finelyness Bareh kum u shongknor, ha ka jingdonlang ki dkhot ka Executive Committee. Ha kane ka jingïalang kila shim ïa ka rai ban buddien ïa ki mat jingdawa jong ka Seng Kur kiba la dep ban phah sha ka sorkar halor ka jingkhlad katei ka longkmie ba armet ha Maternal & Child Health (MCH) Hospital Jowai kaba la jia ha ka 4 tarik u Jylliew, 2025.
Kumta ka seng kur kala pynpaw ka jingsngew bitar halor kane ka jingjia ba sngewsih bad kila dawa na kibor ba halor ban pynshitom tyngeh ïa kiba donkti haka kam namar ka jingbym shimkhia jong ki ïa ka kam ba la bynshet. Ha ka juh ka por kila dawa ban pynïoh ïa ka hok na ka bynta ka longïing jong katei ka longkmie kaba la khlad noh bad kaba la ieh noh shadien ïa ki 7 ngut ki khun.
Shi bynta ban biang ka rukom ai jingshakri ha ki jaka sumar sorkar khamtam ïa ka Khliehriat Civil Hospital, na ka liang ka Seng Kur Bareh kala dawa jur na ka sorkar ban kan pynbiang lut ïa katei ka Civil Hospital katkum ki jingdonkam, khnang ba ki paidbah ka thaiñ kin suk ban ïoh jingïarap.
