Ka Shillong Lajong FC mynta ka sngi ka 21 tarik Naiwieng 2024 ka wan pyntip paidbah lyngba ki lad pathai khubor ha Shillong Press club.
Haba kren sha ki lad pathai khubor mynta ka sngi na ka liang u Nongaiktien jong ka Shillong Lajong Fc u bah Seibor Sana u la ong ba ka I- League mynta ka samoi 2024 -25 ka Shillong Lajong kan sdang ia ka jingiakhun ha la ïing la jong pyrshah ia ka Churchill Brothers ka ban sa long ha ka 24 tarik Naiwieng 2024 ha madan First Ground Polo, Shillong ha ka por 7 baje janmiet.
Shuh shuh u la ong ba ka jingdie ia ki ticket ka la sdang naduh lashai bad ki lah ban ioh ha Police Bazar ha Electronic Centre, ha Laitumkhrah Shillong Cafe, bad ha Shillong Sport Association Stadium Polo bad ia dor jong ka ticket kin sdang naduh ka dor 150 tyngka bad ka ticket ba rem duh kata ka VVIP kan long ha ka dor 500 tyngka.
Shuh shuh u la ong ba sa shisien ka club ka iawer ia ki paidbah ban ai biang ka jingkyrshan ba pura ia ka club kumba ki la kyrshan ha ka Durand cup football ka ba la dep dang shen.
Ka Shillong Lajong ka la long kaba pynkhreh ban iakynduh bad ka Churchill Brothers bad ka thong hi jong ka club ka long ban ioh rah ia kane ka samoi jong ka I- League 2024-25.