Ka Smriti Zubin Irani, ka Minister for Women and Child Development Minority Affairs jong ka sorkar pdeng mynta ka sngi kaba dei ka sngi khadduh jong ka jingïalap Election hapoh ka jylla kala wan ban iuh kjat ha ka shnong Nangbah ban ïalap elekshon ïa u kyrtong ka BJP u ma Lakhon Biam uba ïakhun na ka 3-Raliang Constituency.
Ïa kane ka prokram ïalap election jong u ma Lakhon Biam la pynlong ha Madanpynkai Nongbah (madan ïatur Masi) ha kaba da ki phew hajar ngut ki nongkyrshan jong u ma Biam kila wan sha katei ka jingïalang ha ryngkat ka jingrisa bad ka jingshad jingkmen.
Na ka liang ka Smriti Zubin Irani haba ai jingkren ha kane ka sngi ka la kyntu jur ïa ki nongshongshnong ka Nangbah ba kin pynjop don burom ïa u ma Lakhon Biam ha kane ka kynti da kaba pynsngew ïa ki mat treikam ba kongsan jong ka BJP ynda kan wan ha ka bor da kaba ïoh artylli ki Engine kawei hapoh ka jylla bad kawei ha Nongbah Delhi (Central).
Kala ïathuh na ka liang u Myntri Rangbah duh ka ri u Narendra Modi u don ïa une u kyrtong na Raliang u ma Lakhon Biam. Kala pynsngew baroh ki skim kiba dei ban pynpoi sha ki paidbah kin long kiba ïaid beit ïaid ryntih, wat ha kine ki snem ba la dep ruh ïa ki skim jong ki nongshong shnong ka jylla kila pyrshang ban pynïoh ha man la uwei pa uwei naduh u khaw rashon, ki marbam, ka jingïarap ïa ki nongrep nalor kiwei de, ong ka Irani.
Kumta ka dei ka kamram jong ki paid nongshong shnong ka Nangbah ba kin ïohi jngai ba dei tang ka seng BJP kaba lah ban wanrah shibun ki kam pynroi, kala pynsngew ruh wat ha ka por jong ka khlam Covid-19 ka party BJP kaba shim ka jingkitkhieh na ka bynta ki jingdonkam jong ki paidbah da kaba sam ei ïa ki jingbam.
Kala pynsngew ruh ba ka sorkar BJP kala ai ei ïa ka dawai injek ban ïada na ka Covid-19. Na ka bynta kito ki samla ki bympat ïoh kam ïoh jam bad ki longkmie ka BJP ka don ka thong ban ai jingïarap mar 1000 tyngka manla u bnai, katba ïa kito ki longkmie bym don lok kin ïoh 24 hajar ha ka shisnem. Kiba ïoh khun kynthei kin ïoh ïarap haduh 50 hajar tyngka, wat ïa ki nongïalam jong ka shnong ka thaw kum ki Waheh Shnong, ki Dolloi yn pynpoi jingïarap na ka bynta ki paidbah haduh 10 lak tyngka na ka bynta ban pyntrei ïa ki kam pynroi. Na ka bynta ka skim jong ki nongrep ka PM Kisan yn pynkiew na ka 6 hajar sha ka 8 hajar tyngka kaba ki ju ioh. Lada ki paitbah ki kwah ba kine ki kam pynroi ki wan tuid hapoh kane ka shnong jong ki, ki dei ban ai ka vote ba kordor jong ki ha u ma Lakhon Biam uba dei na ka party BJP.
