Ka Shillong Lajong Fc ka ba la iashim bynta ha ka Durand Cup kaba la long ha JN Complex Polo, da ka jingialehkai bha ha baroh lai tylli ki Game la pynlong ia ka Club ba kan jam sha ka Quarter Final bad kan iakynduh ia ka East Bengal kawei na ki club radbah jong ka ISL ha ka 21 tarik Nailar 2024, ha ka por 7 baje janmiet.
Haba ai jingkren sha ki lad pathai khubor u Bah Seibor Sana, Nongaiktien ka Shillong Lajong Fc u la ong ba da ka jingtrei tyngeh jong ka Club ki la kheit ia u soh ha kaba wan ha ka kyrdan ba Nyngkong ha ka Group Stage.
Shuh shuh u la ai khublei ruh ia ki Nongkyrshan jong ka Shillong Lajong FC kiba lah kyrshan ha baroh lai tylli ki jinglehkai. U ai khublei ruh Ia ki coaching staff ki player ka Shillong Lajong Fc kiba la trei shitom bha ban pynlong ia ka Shillong Lajong Fc ban poi sha ka Quarter Final.
Ha ba khatduh u la kyntu ia ki paidbah ban wan ai ka jingkyrshan ha ka Sngi Balang bad u la khublei ia baroh kiba donkti ban pynlong ia ka Club ban ioh lehkai ha ka Durand Cup bad u ngeit skhem kumba ki paidbah ki la ai ka jingkyrshan na ka por sha ka por bad mynta ka kynti u ngeit ba ki paidbah kin ai ka jingkyrshan ba pura ia ka Shillong Lajong FC.