Ka Executive Committee jong ka Jaintia Hills Autonomous District Council (JHADC) hapoh ka jinglamkhmat jong u Chief Executive Member (CEM) ma T. Shiwat mynta ka sngi kila leit ban jurib ia u pud u sam jong ka shnong Mukroh bad pynthikna ba kum ka Council kan ïeng shynrang ban iada ia u pud u sam kane ka shnong wat hapdeng ka jingpyrshang jong ka Assam ban kam jubor ia kane ka shnong.
Ka EC jong ka Council hadien ba kala iohi ia kane ka jingwan kyntur pud jong ka Assam kaba la wanrah ia ka jingduh jong ki 5 ngut ki mynsiem bakordor jong ki nongshong shnong ka Mukroh kala la shimkhia ia kane ka kam. Nalor kane ka jingjia ba sngewsih kala don pat sa ka jingkynthoh kaba la mih na u CEM ka KAAC uba la ong ba ki nongshong shnong ka Mukroh ki dei kiba la wan shong beaiñ, kumta ka Council ka kwah ban pynshisha ia ka jinglongtrai, kala leit ban jurip ia u pud u sam jong ka shnong Mukroh mynta ka sngi.
Ha kane ka jingleit jurip u CEM ryngkat bad ki EM jong u kila ioh ban leit jurip haduh u Zero Point ha Moothasiangkwai, kumjuh kila jurip ia u pud u sam jong ka shnong Mukroh da kaba pynshisha lyngba ki kot ki sla bad ki sakhi sabut ba shai. Ha kajuh ka por u ma Shiwat bad ka kynhun jong u kila leit ruh ban jurip ia ka jaka kaba la jia ka jingshah siat jong ki nongshong shnong ka Mukroh kaba la jia ha ka 22 tarik u Naiwieng mynta ka snem.
U CEM haba ai jingkren sha ki lad pathai khubor ula ong ba ka jingwan jong ka Council mynta ka sngi sha shnong Mukroh kam dei satia ban tuklar ia u pud u sam hapdeng ki ar jylla hynrei ka dei tang ban pynskem bad pynshisha ia u pud u sam jong kane ka shnong. U la ong ba na ka liang ka Council kan ïeng shynrang ban iada iala u pud u sam bad pynpaw ba ka shnong Mukroh kaba la don la ka jong ka jingsynshar shnong, la u jong u pud u sam uba shai bad ba thikna kam dei ban duh wat tang shilyngkhot ruh ka khyndew ka shyiap.
U ma Shiwat ula ong ba katkum ka jingjurip jong ka EC mynta ka sngi la lap pylleiñ pylleiñ ba ka Assam kala lehbor shisha bad kyntur pud jubor shapoh ki jaka puta jong ka Jylla Meghalaya. Ula ong ba ka jingbuh jong ka Assam ia ka Beat Forest Out Post jong ka, kaba don shapoh u pud ka Jylla da kaba jam jubor ia u Zero Point ka pynpaw ia ka jinglehbor jong ka. U la ong ba ka shnong Mukroh kam dei ka jaka kaba hap ha ki jaka iakhajia pud hynrei ka dei kaba dang don shapoh u pud u sam ka Jylla hapoh ka jingpeit jongkhmih jong ka JHADC.
Na ka liang jong ki nongshong shnong ka Mukroh ki pynpaw ba ki kwah ba ka sorkar kan buh ia ka Police Out Post ha Zero line lane ha mar khappud bad ka Assam ym shapoh ki shnong briew ba jngai na u pud ka Jylla Meghalaya.
