Ka India Meteorological Department (IMD) mynta ka sngi kala ai ka jingpynbna bad jingphikir ba kan sa don ka jingjur bha jong ka jingtap jong u lyoh khyndew ha ki katto katne ki Jylla jong ka ri India khambun ha ki thaiñ North East kiba kynthup lang ia ka Jylla Meghalaya ha ki ar sngi ban wan kata ha ka 11 bad 12 tarik mynta u bnai.
Ka IMD ka iathuh ba kane ka jingtap lyoh kan jur bha ha ka por mynstep. Ki Jylla ki ban shah ktah ha kane ka jingtap lyoh ki kynthup ia ka West Bengal, Assam, Nagaland, Manipur, Mizoram, Tripura bad ka Meghalaya.
Ka IMD kala iathuh shuh shuh ba kan sa don ka jinghap jong u phria ha ki katto katne ki bynta jong ka Sub-Himalayan kum sha West Bengal bad Sikkim ha ka 12 tarik mynta u bnai.
La iathuh ruh ba ka eriong Michaung kaba la lynshop ia ka jylla Tamil Nadu bad Andhra Pradesh ha kine ki sngi bala dep, mynta ka la kham duna bor bad tlot bad kala rung sha ki bynta jong ka jylla Jharkhand kaba la wan rah lang ruh ia u slap u bym da jur than ong ka IMD.