Ki bor pyniaid jong ka Pynursla Civil Sub-division, Pynursla lyngba i kong E.L. Warjri, MCS, iba dei i ADC jong kane ka Sub-division, ila pyntip ba kan don ka jingkhang ia ka leit ka wan lyngba u surok Shillong-Dawki ha ki bynta jong ka shnong Rngaiñ kaba don ha ka KM ba 32.
Ka daw ba khang ia kane ka surok ka long ba kan don ka jingpynlong ia ka State Level Mock Exercise 2025 ka ban sa pynlong ha katei ka Sub-division naduh ka por 9:30 AM haduh 11:00 AM ha ka 20 tarik mynta u bnai.
Na ka liang ki bor pyniaid ki kyntu ia ki nongleit nongwan bad nongshong shnong ka thaiñ ban iai shah shipor bad ruh ban ia snohkti lang bad ki bor pyniaid halor kane ka jingpynlong ia ka Mock Drill, kaba long kum ka jingpynkhreh ia ki lad jingiada lada jia ba khih u jumai ha kano kano ka por.