Ka Dorbar shnong Tympang Iawmusiang hadien ka jingiaishah kaba la ar bnai ei ei, mynta ka sngi kala leit ban iakynduh ia u Deputy Commissioner ka West Jaintia Hills District na ka bynta ban pynbor ia ki bor ba dei peit ban pynkhuid noh ia baroh ki jakhlia kiba don ha ki bynta bapher bapher jong ka Iawmusiang. Ha kaba ka Dorbar Shnong kala ai por ruh 3 sngi ban leh ia kane ka kam, lym kumta kan sa don ka jingkhang shnong ha ki bynta baroh jong ka Shnong Tympang Iawmusiang.
Mynta ka sngi ki nongialam bad ki dkhot jong ka DS Tympang Iawmusiang hapoh ka jingialam jong u Waheh Shnong ba thymmai u ma Ajoy Lywait bad u Secretary ma Heisar Laloo kila leit ban ai da ka jingthoh sha u DC ma Garod LSN Dykes na ka bynta ban bthah ia ka JMU ban pynkhuid noh ia kine ki jakhlia kiba la lumthup hapoh Iawmusiang naduh ka 4.2.2022.
Ki nongialam shnong kila pynpaw ba ka jinglumthup jong kine ki jakhlia kala wanrah ka jingeh kaba khraw ia ki nongshong shnong ka Tympang Iawmusiang, ia ki nongshong dukan bad shong iew bad ia baroh ki paidbah kiba dei iaid dei ieng lyngba ka Iawmusiang. Tang na ka daw jong ka jingmih ka jingsma kaba jur na kitei ki ñiut la don katto katne ki dukan bad ki jaka shongdie kila hap ban khang khyrdep noh kaba la ktah ia ka kamai kajih jong ki.
Ka jingsahkut jong kine ki ñiut ki ñier ka la pynkhapniah wat ia u surok kaba la ktah ruh wat ka ia iaid ka ieng jong ki kali motor bad wanrah ia ka jingsahkut kali. Lyngba kine ki ñiur la mih ka jingsma kaba shyrkhei, bad ka jingbun jong kine ki jakhlia ka dei ruh na ka jingwan bret jakhlia jong ki nongshnong bapher bapher jong ka nongbah Jowai namar ym don shuh ba wan ban pyllum ia ki ñiut na ki dong ki shnat kumba ju long mynshwa.
Haba ai jingkren na ka liang u Waheh Shnong u ma A. Lywait ula ong ba ka long kaba donkam ban iada na ki jingma jong ki nongshong shnong ka nongbah Jowai khamtam eh kiba shong basah ha ka shnong Tympang Iawmusiang kiba mad ia kane ka jingeh baroh 24 kynta. U la kyntu ia ki bor ba halor kiba dei peit jong ka Municipal, ban pynkynriah noh ia kine ki ñiut na Iawmusiang hapoh lai sngi naduh ba la phah ia kane ka jingthoh.
La ai jingmut ruh ba ia kine ki ñiut la dei ban leit bret sha ka jaka ba ju bret mynshwa kata sha Mynkjai kumba ju long ha ki 40 snem ba la dep. Namar ka jingleit bret ia ki ñiut sha katei ka jaka kam shym la ktah satia ia ka jingkoit jingkhiah jong ki briew kiba don sha katei ka jaka namar ka jaka bret ia ki ñiut ka jngai na ki shnong ki thaw, ban ia kaba ieh sah ia ki ha Iawmusiang kaba buh ka jingma kaba khraw eh ia baroh ki khun ka ri Jaintia.
U ma A. Lywait ula ong ruh ba lada ka sorkar kam lah ban leh ei ei hapoh kine ki lai sngi ka Dorbar Shnong kam banse ban shim ruh ia ka rai ban khang shnong noh shi syndon ka kum ka jingiada bad jingbha ia ki paidbah ba bun ba lang.
