Halor ka jingshah shet kylla bad shukor ki Karkhana Dewbilat ia ki trai trok ka jylla kiba kit ba bah ia ka dewbilat bad dpei Clinker ban shallan sha kylleng ka jylla Meghalaya bad sha kiwei de ki jylla ka thaiñ North East, ki Seng ki Trai Trok hapoh ka Lama jong ka Joint Action Committee, kaba kynthup ia ka All Jaintia Cement and Clinker Association (AJCCTA) bad ka Meghalaya Truckers’ Union (MTU) ki la rai ban khot da ka General Meeting ban iakren halor katei ka jingeh bad ban shim ia ki rai pyrshah ia kitei ki karkhana pynmih Dewbilat kiba don ha East Jaintia Hills.
Ia kane ka General Meeting la rai ban pynlong ha ka 9 Tarik mynta u bnai ha shnong Ialong hajan ka Toll Plaza (Tollgate), West Jaintia Hills ha ka por 11 baje mynstep.
Ka JAC ka kyntu ia ki paidbah khamtam ia ki trai trok ba kin sngewbha ban wan khlem pep sha kane ka general meeting khnang ban ioh ia kren sani halor ka jingeh ki trai trok haba iadei bad ki kharkhana dewbilat.
Ha kajuh ka por, ka JAC kan iakren ruh halor ka jing tlot trei kam ki nong ialam ka JAC, ki ar seng kamjuh ki paidbah khamtam ki trai trok ki sah umdum halor ki kam ba sah teng jong ka JAC mynta la shi snem tam.
“Ka jingsahteng ki kam ka JAC ha kaba iadei bad ki Cement Plant halor ka jingshah lehbein ki trai trok la hap ban khot ia kane ka General Meeting”, la ong ki ar ngut ki nongialam ka JAC kiba kynthup ia u ma Balen Thubru, President ka AJCCTA bad u President ka MTU u bah Monte Ranglong.
Kitei ki nongialam ki la iathuh ba ki mat iakren katei ka sngi kin kynthup ia ka dor bai kit bai bah ka bym trei kam, ka Gowdown ba don ha Meghalaya hynrei lapynkyriah sha Assam, ka jingthied trok ka Star Cement haduh palat 300 tylli, ka jingshim pisa kulmar ka tollgate, ban Pynthymmai Nongkitkam bad kiwei kiwei.