Ka JSU Seng Kmie kan khot pynlong da ka jingialang paitbah ha ka 22 tarik mynta u bnai ha ka por 11 baje ha khmat DC Office na bynta ban dawa na ka sorkar ban kit mardor ia ki ñiut bala lang lah bun bnai mynta ha Iawmusiang Jowai. Ka seng ka pynpaw ba kam lah ban shu sngap jar ban shu peit kai ia ka jinglong jingman ka Iew Musiang mynta namar ki jakhlia kiba la lang da ki phew ton haduh mynta ki dang neh haduh mynta bad ka kut tang ha ka jingiakren khlem poi shano shano.
Na ka liang ka seng ka wer ia baroh ki nongshong iew bad ki paitbah ba kin wan lang sha kane ka jingialang paitbah ha khmat DC office ban dawa da ka wei ka sur na bynta ka khuid ka suba ban lait na ka jingtngit ka iew bad lait na ki jingpang ki ba mih na kine ki jakhlia ba ha rukom kiba ktah mynta ia ki paitbah nongleit nongwan bad ki nongshong shnong ba marjan bad ka iew.