Ki nongbud jong u ma Justine Dkhar uba ju long teng u MLA ka 6-Khliehriat Constituency ha ka jingialang paidbah kaba la long mynta ka sngi da kawei ka sur kila shim ia ka rai ban ai noh ka jingkyrshan ia u ma Kyrmen Shylla uba dei u MLA ka thaiñ mynta hadien ba u ma Justine ula pynbna ban ym iakhun shuh ha kane ka Elekshon MLA 2023.
U ma Justine Dkhar u dei u MLA ka thaiñ naduh u snem 2013-18 bad uba shah rem pat ha u snem 2018, mynta ka sngi u la shim ia ka rai ban ym ia khun shuh ia ka Electioh MLA ka ban sa long ha u snem 2023. Ka daw jong ka jingbym iakhun shuh ka jong u ka long ba mynta u don hapdeng jingbym biang bha ka met ka phad ne ka jingkoit jingkhiah, u la ong ba ka kam politic khlem ka jingkoit jingkhiah ba pura kam long kaba lah ban pyndep ia ki kam ki jam kiba bun ha ka jingshakri ia ki paidbah.
Kumta mynta ka sngi u ma Justine u la pynlong ia ka jingialang kaba bad ki nongkyrshan jong u ha Hotel Eastside Inn, Lad Rymbai by-pass Jalyiah, ha kaba kiba bunki nongkyrshan jong u ki la wan sha kane ka jingialang, ka jingthmu ba hakhmat jong kane ka jingialang ka long ban un pyntip ne pynshai sha ki nongkyrshan jong u ia kane ka daw ba un nym iakhun shuh ia ka Election MLA 2023, bad ban ai ka rai sha ki nongkyrshan jong u shano kin phai ne kyrshan ha kane ka Election MLA ka ban wan.
Kumta ha kane ka jingialang mynta ka sngi na ka liang ki nongbud jong u ma Justine kiba dang kyrshan ia u haduh mynta, ki la ai jingmut ia u da kawei ka sur baroh ban ai noh ka jingkyrshan ba pura ia u ma Kyrmen Shylla uba long u MLA ka thaiñ ba mynta bad ha ka juh ka por u myntri ka sorkar jylla.