Ka North Liberty Higher Secondary School Jowai kala ïoh ban mihkhmat sha ka lympung ïalehkai phutbol jong ki khynnah skul ka ‘State Level Inter School Subroto Mukherjee Cup Football Tournament- 2023’ ka ban sa long shen ha nongbah Shillong, katba ha ka H.K. Singh Memorial Secondary School kan mihkhmat haka kyrdan Under-14 jong ki kynnah shynrang.
Kine ki lai kynhun kila long ki lahduh mynta ka sngi nyngkong haka jingïakhun ‘Dsitrict Level Inter School Subroto Mukherjee Cup Football Tournament- 2023’ bala pynïaid da ka ophis u District Sports Officer (DSO) West Jaiñtia Hills District, Jowai ha Kiang Nangbah Stadium, Dongmihsngi Jowai.
Haba phai sha ka jingïakhun Final mynta ka sngi ha ka kyrdan Under-17 ki kynthei ka North Liberty H/S School kala lah ban pynliem da 2-0 kol ïa ka Kiang Nangbah H/S School. Ïa ki ar kol na ka North Liberty H/S School la thep da ka Eiladki Ksoo ha ka minit ba 30 bad ka Deigracia Dan ha ka minit ba 42.
Ha ka Under-14 (Boys) ka H.K Singh Memorial Sec. School kala pynliem da 1-0 kol ïa ka Lumpyrtuh Sec. School, ïa katei ka sihkol na ka H.K Singh Memorial la thep da u Seibor Dkhar ha ka minit ba 49.
Katba ha ka jingïakhun jong ka kyrdan Under-17 (Boys) ka North Liberty H/S School ka la pynliem da 3-0 kol ïa ka Govt. Boys H/S School, ïa kitei ki 3 kol na ka North Liberty la thep da u Sahame Lyngdoh ha ka minit ba 4, u Lovingstar Suting ha ka minit ba 48 bad u Micky Roy Swer ha ka minit ba 50.
Ïa ki khusnam sha ki nongjop la sam da u kongsan jong kane ka sngi uba dei u Addl. Deputy Commissioner ma Mark Andrew Challam uba la ai ruh ka jingkyntu ïa baroh ki rang ïalehkai kaba kongsan duh ha ka jingim dei ban jop ha ka mynsiem bad ha dohnud. Shuh shuh ula kyntu ïa ki rangïalehkai ba kin treishitom khnang ba kin poi sha ka thong jong ka jingjop bad kyrmen ba kin wanrah ïa ka jingsarong ïa ka District hi baroh kawei.
Ha kane ka sngi la ïadonlang naduh u DSO ka WJHD ma K. Passah, u Waheh Shnong ka Mihmyntdu ma Abul Phawa, u Working President ka WJDSA ma E.M.H Passah, ki Dkhot ka Association, ki Nonghikai, ki khynnah skul nalor ki riew ieit phutbol ka District.
