Ka kynhun ïalehkai ha ka liang ki kynthei ka Amlarem Govt. L.P School bad ka Padu United A na ki shynrang kila ïoh ban mih khmat ïa ka West Jaiñtia Hills sha ka State Level haka jingïalehkai phutbol Chief Minister U-12 Open Football Tournament 2023.
Kine ki ar kynhun napoh ka District kila long ki lahduh hadien ka jingïakhun phainal mynta ka sngi (9.5.2023) ha ka lympung bala tip kum ka “Chief Minister District Level U-12 Open Football Tournament 2023”, ba la pynlong da ka ophis jong u District Sports Officer (DSO), West Jaiñtia Hills District, ha madan Kiang Nangbah Stadium Dongmihsngi, Jowai.
Haba phai sha ka jingïakhun Final, ha ka liang ki kynthei ka Amlarem Govt. L.P School (Amlarem Block) kala pynliem da 1-0 ïa ka Mukhla Grassroot Centre (Thadlaskeiñ Block), katba ha ka liang jong ki khynnah Shynrang pat ka Padu United A (Amlarem Block) kala pynliem da 1-0 kol ïa ka Ummulong Grassroot Center (Thadlaskeiñ Block).
Ïa ki khusnam sha ki nongjop la sam da u kongsan jong kane ka sngi ma E.M.H. Passah uba dei ruh u Working President ka WJDSA, Jowai ha ryngkat ka jingïadonlang ki nongkitkam jong ka Association nalor kiwei de.
