Ka North Liberty Higher Secondary School, Jowai kala ïoh ban leit mihkhmat ïaka West Jaiñtia Hills District sha ka State Level haki ar tylli ki kyrdan kata ka Under-17 (Girls) bad ka Under-17 (Boys), katba ka Dominic English U/P School, Namdong ka mihkhmat haka kyrdan Under-15 (Boys) jong ka lympung ïalehkai ki khynnah skul ka Subroto Mukherjee Cup 2024.
Kane kala wan hadien ba kitei ar tylli ki skul kila long ki lahduh haka jingïakhun phainal mynta ka sngi haka ‘District Level Inter School Subroto Mukherjee Cup Football Tournament 2024′ bala pynïaid da ka ophis jong u District Sports Officer West Jaiñtia Hills District, ha madan Kiang Nangbah Stadium, Jowai.
Haba phai sha ka jingïakhun Final haka kyrdan Under-17 (Girls) ka North Liberty H/S School kala lah ban pynliem da 7-0 kol ïaka Kiang Nangbah Govt. H/S School, Jowai.
Haka kyrdan U-15 (Boys) ka Dominic English U/P School, Namdong kala lah ban pynliem da 1-0 kol ïa ka St. Dominic H/S School. Ïa katei ka shikol na ka Dominic English U/P School la thep da u Aibor Wahlang haka minit ba 7.
Katba haka kyrdan U-17 (Boys) ka North Liberty H/S School kala lah ban pynliem da 2-0 kol ïa ka Govt. Boys H/S School. Ïa ki kol na ka North Liberty la thep da u J.Nial Rasmut haka minit ba 8 bad u Rio Marboh haka minit ba 39 lyngba kine ki ar kol kala pynlong ïa ka North Liberty ban ïoh rah ïa ka nam lahduh.
Ïa ki khusnam sha ki nongjop la sam da u kongsan jong kane ka sngi MLA ma Wailadmiki Shylla uba dei ruh u Chairman ka Meghalaya Urban Development Authority (MUDA), haka jingdonlang u DSO ma K. Passah, Working President ka WJDSA ma E.M.H Passah, Vice President ma Patrict Lamare nalor kiwei de kiba la shah khot sngewbha.
