Mynta ka sngi ka sorkar jylla lyngba ka tnad Planning ha ryngkat bad ka tnad ISRO jong ka ri India kila ai ka jingkren sha ki nongthoh khubor (Press Conference) ha Main Secretariat Conference Hall, Shillong na ka bynta ban ioh jingshai bad jingtip halor ka jingialangbah jong ki 20 kynhun ki ri ka pyrthei ne ka G20 Meet ka ban sa long ha nongbah Shillong ha kane ka sngi Nyngkong (17.04.2023).
Na ka liang jong u Principal Secretary jong ka Planning Department, Dr Shakil P Ahammed, u Commissioner & Secretary jong ka Planning Department u Dr Joram Beda bad u Director jong ka ISRO u Dr Sudheer Kumar kila ai ka jingkren sha ki nongthoh khubor ia ki prokram jong ka G20 Space Economy Leaders Meeting (SELM).
Kane ka jingialang jong ka G20 SELM ba kynthup ia ka jingplie sdang ban pynlong ha ka 17 tarik mynta u bnai ha ka por 10:00 baje mynstep ha Courtyard by Marriot, Shillong bad kan long ar sngi katta haduh ka 18 tarik.
Ha ka sngi sdang jong ka G20 SELM kan don ka jingkren na u Somanath S bad ruh na ki Secretary bad Chairman jong ka Department of Space (DOS)/ISRO, na ki Myntri ka sorkar pdeng bad ruh na u Myntri Rangbah ka jylla u Conrad K Sangma. (MIPR)
Kumban shu pynkynmaw ba ki ri kiba don hapoh ka kynhun G20 ki kynthup ia ki ri hapoh ka European Union nangta ka Argentina, Australia, Brazil, Canada, China, France, Germany, Greece, Italy, Japan, Korea, Mexico, Russia, Saudi Arabia, South Africa, Turkey, United Kingdom bad United States.