Ki artylli ki seng riewlum kiba don hapoh ka shatri jong ka Regional Democratic Alliance (RDA) ki ba ju ïatreilang kata United Democratic Party (UDP) bad Hill State People’s Democratic Party (HSPDP) mynta ka sngi ka 11 tarik u Nohprah, 2024 ki la shim ia ka rai ba kin ïaid la ka jong ka jong ha kane ka elekshon MDC ka ban sa long Shen na ka bynta ka Khasi Hills Autonomous District Council (KHADC) bad Jaiñtia Hills Autonomous District Council (JHADC).
Haba kren sha ki lad pathai khubor u Chairman ka RDA uba dei ruh u President ka UDP u Bah Metbah Lyngdoh, u la pyntip ba hadien ka jingiakren bad iatai sani bha bad da ka jingiasngewthuh jingmut ki la shim ia ka rai ba kin pynïeng kyrtong lakajong bad kin hap ban ïakhun pyrshah Constituency.
Haba ia dei bad ka jingbteng ka RDA, u la ong pat ba kane ka rai ban pynieng Kyrtong la ujong kan nym ktah ia ka jingiadei hapdeng ki ar seng saiñ-hima. U la ong ba ka jingiatreilang ha ka RDA kan bteng namar la shim ia ka rai da ka jingiamir jingmut lang jong ki nongïalam ka HSPDP bad UDP.
Ha kaba ia dei bad ki kyrtong MDC na ka Liang ki Nongialam jong kine ki ar seng ki la ong ba shen kin sa pynbna.
