Ka Seiñ Kur Dkhar East Jaintia Hills District, kan Pynkup Burom (Felicitate) ia ka Irene Dkhar, na ka shnong Rymbai (EJHD), kaba la wanrah dang shen ia ka nam bad ka burom ba khraw ia ka Jylla Meghalaya bad khamtam eh ia ka Jaidbynriew Hynñiewtrep jong ngi, kum ka samla kynthei kaba bha briew tam ha Northeast India, da ka jingjop don burom jong ka, ia ka Jingiakhun, “Miss Northeast, 2022.”
Ia kane ka Jingpynkup Burom ia ka Miss Northeast, 2022, ka Miss Irene Dkhar, ka Seiñ Kur Dkhar-EJHD, kan leh ha ka 12th December, 2022, ha Community Hall, Khliehriat West, ha ka por, 10.30 AM.
Ha ka jingiadei bad kane, ka Seiñ Kur Dkhar East Jaintia Hills District, ka khot sngewbha ia baroh ki Para Kur Dkhar ban ia pyllait por khnang khnang ban iawan khlem pep sha katei ka programme jong ka, kaba la kdew haneng, khnang ba kan long kaba phuh ba phieng bad ruh kaba jop pura.
Ha ka juh ka por pat, u kyrwoh na ka Seiñ Kur Dkhar-EJHD, u la bynrap pat ba, na ki daw bym lah kiar, ia mynta hi ka kynti, ia ka Jingpynkup Burom ia ki para-kur jong ngi halor ki bynta ba pher ba pher, ka Seiñ Kur Dkhar-EJHD, kan leh shwa tang ia ia ka Miss Northeast, 2022, ka Ms. Irene Dkhar, katba ia kiwei pat ki Jait Jingpynkup Burom jong ka Seiñ Kur Dkhar-EJHD, yn sa leh pat hadien ba la dep kane ka Meghalaya Legislative Assembly Election, 2023.