Ka Seiñ Raij Ialong ryngkat bad ka jingiatreilang bad ka Tourism Department, West Jaiñtia Hills District kin pynlong ia ka jinglehkmen kaba la tip kum ka ‘Winter Festival’ ha ki ar lynter kata ha ka 28 bad 29 tarik mynta u bnai. Ia kane ka Festival yn pynlong ha Madan Lyngkien Ialong.
Ha ka sngi sdang kata ha ka 28 tarik yn don shibun jait ki Cultural Program ryngkat bad ki Nongrwai ba pan naw ki ban wan ban iashim bynta lang. Ia ka prokram ha kane ka sngi yn sdang naduh ka por 2:00 PM.
Ha ka sngi ba bud kata ha ka 29 tarik yn wan pynshongshit ia kane ka Festival da u nongrwai ba paw na ri United Kingdom (UK) u J-SOL bad kiwei de ki nongrwai bad ki DJ ba pawnam ki ban sdang rwai naduh ka por 2:00 PM.
Ha kane ka Winter Festival yn don ruh ki jingialehkai bapher bapher, kiba pynbyrngia ia ki paidbah kumjuh ruh ki don shibun jait ki jingbam kiba bang bad ba shngiam kiba ban pynhun ia ki nongwanpeitkai baroh.
Kumta na ka liang ki nongpyniaid jong kane ka Winter Festival ki khot sngewbha ia baroh ki paidbah kiba na jan bad na jngai ban wan sakhi lang ia kane ka jinglehkmen ba kyrpang jong kane ka snem.
Kane ka long katkum ka jingpyllait khubor jong u President ka Sein Raij Ialong ma Pyrkhat Shylla bad u General Secretary Sein Raij Ialong ma Juhhi Pale.
