Ka Jaiñtia Body Building & Fitness Association (JBB&FA) kala pyntip paidbah, kan pynlong biang ïaka rynsan pyni dohksah ba heh duh ha Nongbah Jowai kaba la tip kum ka “4th All Meghalaya Amateur Body Building Championship Mr. Ironman Amateur 2024” ka ban long haka 14 tarik u September, 2024 ha District Library Auditorium Mynthong, Jowai.
Lyngba kane ka rynsan kan plie lad ïaki khun samla ka Ri-Lum Jaiñtia ba kin pynpaw pyrthei ïa ka rukom pynwan dur jong ki ïaki dohksah. Na ka liang JBB&FA kan sa sam ruh ïa ki khusnam (Award) sha ki nongjop ha ryngkat ka song pisa bad ki Syrnod da ka jingithuh ka Meghalaya Body Building & Fitness Association bad ka World Fitness Federation (WFF).
Na ka liang ki rang pyni dohksah napoh ka Ri-Lum Jaiñtia kiba kynthup ïa u B. Desire Kynjing uba la ïoh Gold Medal haka Mr. Meghalaya (Men Physic), u Pyniooladmi Pala uba la jop haka Mr. Iron Man Over All Winner (Men Physic) bad ka samla Sawakani Lakiang kaba jop (1st Place) haka Bikini Model Category haka WWF India World Fitness Federation Mr. & Ms. East India 2023 Zonal Body Building & Models Championship, ha ka jingkren sha ki lad pathai khubor ha kane ka sngi Saitjaiñ 27 tarik kila khot bad wer ïa baroh ki khun samla Shynrang bad Kynthei kiba dei ki nongshong ka Jylla Meghalaya ba kin mih shakhmat ban ïashim bynta ha kane ka Mr. Ironman Amateur 2024 ha Jowai.
La pyntip ba ka dor jong ki Ticket na ka bynta ki paidbah kiba wan sakhi, ki lah ban ïoh ha katei hi ka sngi haka jaka ba pynlong ïa kane ka rynsan kiba long kumne: 1) Donors Card Rs.500 bad 2) Executive Class Rs.200 tyngka.
Naka liang u Samla Yoosar Kynjing uba dei u President ka Jaiñtia Body Building & Fitness Association, ula ong ka jingpynlong ïa kane ka rynsan ka long kum shi bynta ban plie lad plie lynti ïa ki khun samla napoh ka Ri-Lum Jaiñtia ban kin pynpaw pyrthei ïa ka sap ka phong ba ki don, nangne kiba jop ïaka Mr. Ironman Amateur 2024 kin ïoh lad ban mih khmat ïaka jylla ha ki jingïakop bapher bapher hapoh ka Ri.
Shuh shuh ula kyntu ïa ki khun samla napoh ka Ri-Lum Jaiñtia ban long kiba sngewtynnad ïaka jingkilan met (Gym) kaba lah ban wanrah ïa ka jingkoit jingkhiah bad ban lait na ki kam sniew kiba ha rukom. Kumba long mynta ka kam ïalehkai ‘Gym’ kala sdang ban suh thied hapoh ka Ri-Lum Jaiñtia ong u samla Yoosar.
Ula ïathuh ruh ba ka jingpynlong ïa kane ka rynsan ka long ruh kum shi bynta ban rakhe ïa ka jingdap 4 snem jong ka jingïaid lynti ka Jaiñtia Body Building & Fitness Association (JBB&FA), Jowai haka jingshakri.