Ka Seng ki Nonghikai Skul Adhoc ha Meghalaya ka “Federation of All School Teachers of Meghalaya (FASTOM), ka la pynlong ia ka General Meeting jong ka, ha ka tarik 13 tarik u September, 2025 ha Dobasipara Hr.Secondary School, Tura ha ka por 11.00AM.
Ha kane ka Meeting, ka Federation ka la ioh ban iatai sani bha bin pa bin ha kaba iadei bad ki mat jingdawa jong ka, kaba la phah sha ka sorkar Meghalaya naduh ki snem ba kham mynshwa ter ter haduh 2022, 2023, 2024 ban kyntiew (upgrade) Deficit noh ia baroh ki Adhoc Skul ha Meghalaya naduh Lower Primary skul, Upper Primary skul, Secondary skul haduh Hr.Secondary Skul.
Ka Federation ka la iatai sani bha ruh ha kaba ia dei bad ka State Education Commission ba ka sorkar ka la thaw ha ka snem 2022, da ka jingthmu ban peit ia ki jingdawa bad ki jingeh jong ki Seng bapher bapher kynthup ia ki jingdawa jong ka Federation, hynrei phewse, kat kum ba paw hi, ha kitei ki lai snem shiteng ei ei, ka sorkar ka khlem leh ei ei ruh em ha kaba iadei bad ki jingdawa jong ka Federation bad kumba ka paw shai hi, ka shu don tang ka Discussion Paper ka ba khlem iakren ei ei ruh em ia ki mat jingdawa ba la ai jingmut sha ka Commission la kum ba lai ne saw sien ei ei.
Halor jong kine ki nongrim ba lehkuman bad bym pynsngap jong ka sorkar, ka General Meeting ba la long ha ka tei ka sngi ha Tura, da ka wei ka Sur ba jam bha, ka FASTOM ka la shim ia ka rai ban pynlong noh da ki jingiakhih ban mih biang sha surok kum ka dak ban pynpaw ia ka jingbymsngew hun ia ka jingleh mynthi jong ka sorkar. Ka jingiakhih kaba khlem buh por (indefinite) kan sdang da ka ba pynlong shuwa ia ka March Rally ka ban sdang na Madan Malki, Shillong ha ka tarik 22.September.2025 ha ka por 11:00 AM bad ka jingiakhih kan iai bteng beit haduh ba ka sorkar kan pyntrei kam noh ia ki mat jingdawa ban kyntiew deficit noh ia baroh ki Adhoc Skul ha Meghalaya.
Ha Garo Hills Regions pat ka jingiakhih da kaba shong kyllain myngngor (sit in demonstration) kan sdang ha ka tarik 24.09.2025 ha Tura ha ka por 11:00 AM.
Kane ka long katkum ka jingpyllait khubor na u Publicity Secretary FASTOM ma E.G War,
