Ka Shnong Panaliar hadien ba ka la shimti pura ia ka “Syntu Ksiar Fish Sanctury” kaba don ha ka Wah Myntdu, ban peit bad pyniaid hi ia katei ka jaka, kaba la aiti ha ka Panaliar Tourism & Environmental Development Society (PTEDS), ban pyniaid ia baroh ki kam.
Kumta ha ka jingleit jurip (Inspection), ka Society ha kane ka 26th July 2025, halor ka jingujor na kiba bun balang ba don ki briew kiba khwai Dohkha tuh ha katei ka thwei. Kumta ka Executive Committee jong ka shnong da ka mynsiem ba sngewkhia, kala shim ia ka rai ban pynshitom da kaba daiñ kuna Rs. 10,000/- (Shiphew hajar) tyngka, ia kino kino ki briew kiba wan khwai tuh ha katei ka jaka ba la khang pyrshah da ka Shnong, haka juh ka por ka shnong kan ai Buskit Rs. 5,000 (san hajar) tyngka, ia kiba pyntip ne report shaphang ki nongleh pyrshah, khlem da pynmih ia ka kyrteng ki nongpyntip.
Kiba shah kem ne kiba leh prshah kin shah daiñ kuna kumjuh ruh kin shah set phatok ryngkat ki kyndon aiñ ong u Waheh Shnong Panaliar, ma Riquoma Rq. Laloo.
Kumta na ka liang ka Shnong Panaliar, kala buh ia ka jinhgkyntu ia baroh, ban iatreilang naduh ka jingkhuid jingsuba sha ki rud jong katei ka jaka jong ka wah, haka juh ka por ban ia peit lang ia ki nongkhwai kiba leh pyrshah ne kiba wan ban pynjaboh, da kaba pyntip sha ka shnong khlem kano kano ka jingtieng, namar ka bor shnong kan don lang bad ki.
Ka Shnong Panaliar ka kyntu ruh ia ki ba najan bad na jngai ban tip ban khein kor ia ki sawdong sawkun jong ka mei mariang, da kaba ym dei ban pynjot pynpra bad pynjaboh ia ki sawdong sawkun jong ka mariang. Ka shnong ka khot ia ki nongwan jngohwai da ka mynsiem kaba khuid ba suba, hynrei ka khang pyrshah pat ia kito kiba don ka mynsiem ban pynsniew ne leh ia ki kam ba la khang pyrshah.
