Ka jingdkhat jubor ia la ka jong ka jingim (suicide) ka long kaba sngewsih shikatdei eh kaba wanrah ia ka jingsngewsih kaba khia ia kito kiba lait na kane bad ka jinglyngngoh kaba khraw ia kiba haiing ha sem bad ka shnong ka thaw hi baroh kawei bad namar kata, da ka jingthmu ban ialeh ban pynduna ia kum kine ki jingjia bad ban pynsngewthuh ia ki shnong ki thaw shaphang ka bor ba la thaw ban iada na kane, da kaba rakhe manla u snem ia ka 10 tarik u Nailur kum ka “World Suicide Prevention Day”.
Ka International Association for Suicide Prevention (IASP) ka ju pynlong ia ka Cycle Around the Globe Challenge man la u snem ban pynshlur i iwei pa iwei kylleng ka pyrthei ban trei lang kum ka kynhun ban leit da ki cycle na kawei ka jaka sha kawei pat da ka jingthmu ban pynsngewthuh kylleng ka pyrthei bad ban iasam lang ia ka khubor ba ka long kaba lah ban iada na ki kam ban dkhat jubor ia la ka jong ka jingim (suicide).
Ka SAN-KER, Shillong ha ka jingiatrei lang bad ki nongshong shnong ka East Jaintia Hills District, Khliehriat, kan pynlong ia ka Cycle Rally ha ka 9 tarik u Nailur, 2023 ha ka por 7 baje mynstep kaban sdang na Don Bosco College, Byndihati sha Good Shepherd Secondary School, Ladrymbai bad ban wan phai biang sha ka jaka ba sdang.
La pynbeit ruh ba kan don ka jingiatai bad phylliew jingmut lang ryngkat bad ki paidbah nongshong shnong ka East Jaintia Hills halor ka phang “Ka jingdkhat jubor ia la ka jong ka jingim (suicide)” ka ban long ha kajuh ka sngi ha ka por 10 baje mynstep ha Auditoriam ka Don Bosco College, Byndihati, East Jaintia Hills District.
Kane ka long katkum ka jingpyntip da i Dr. S.S. Syiem, iba long u Director, SAN-KER, Mawroh, Shillong.