Ka Balang shnong jong ka shnong Pasyih jong ka Parish Mooksiang (Phramer) West Jaintia Hills District, kan rakhe ia ka jingdap shispah snem ka jingwan ka Balang Katholik ha shnong Pasyih ha kane ka 29 tarik Kyllalyngkot 2023 bad ha kane ka juh ka sngi yn pynkhraw ia kane ka jingrakhe jingdap shispah snem yn pynlong ruh ia ka Proseshon Iukharist jong ka Parish Mooksiang ha shnong Pasyih.
Ka shnong Pasyih ka jngai tang kumba 10 Kilomiter eiei na ka Sor Jowai ha ka surok na Jowai –Pasyih –Mynsoo-Shilliang myntang.
Ha ka 29/01/2023, ka jingknia Mass Iukharist bakhuid kan long ha ka por 10 baje mynstep (10.00 AM) bad ka Proseshon kan sdang ha ka por shibaje eiei nohphai sngi.
Ban pynkhraw ia kane ka sngi na ka liang ki Phadar ka Parish Mooksiang, ka Parish Pastoral Council bad ki paidriewngeit ka Balang shnong Pasyih ki khot ki wer ia ki Para-khristan jong ki Parish bapher bapher jong ka Jylla niam Jowai bad ia ki paid khristan na ki Parish bapher bapher jong ka Jylla Niambah Shillong bad Jylla niam Nongstoin ban ia wan ha ka ban pynkhraw ia kane ka jingiakhre jingdap shispah snem ka Balang ha shnong Pasyih bad ka Proseshon kaba shisien shisnem jong ka Parish Mooksiang.