Ka seng JSU mynne ka sngi ka la pynlong iaka jingkynduh lang ki dkhot ka Central Executive Committee (CEC) na kylleng ki Unit bad ki Circle ryngkat bad ki nongialam ka seng kmie ka seng.
Ia kane ka CEC la pynlong ha Orchid Hall Thadlaskein ha kaba da ki spah ngut ki dkhot na kylleng ka ri Lum Jaintia bad na nongbah Shillong ki lawan sha kane ka jingialang. Iaka jingialang la pyniaid da u President Rangbah ka seng u samla Jersom Shylla bad ia ki mat iathir la lam khmat da u General Secretary rangbah ka seng u samla Treiborlang R Suchen bad ia ka kyntien ai khublei la ai da Vice President ka seng u samla Aplang Lamare.
Ka CEC jong ka seng ka la shim ia ka rai ban wer lang ia baroh ki dkhot bad ki nongialam barim ka seng ban ia don ryngkat ha ka sngi rakhe dap 50 snem ka seng ha u ne snem ban wan. Ka seng ka shim ruh iaka rai ban tei noh la ka jong iing treikam ne ka ophis treikam hapoh ka jaka ba ka seng ka la ioh sngewbha ha ki snem ba lah dep hapoh shnong Jowai.
Ka CEC ka seng ka la rai ruh ba yn iaid shakhmat iaka jingdawa ILP hapoh ka jylla namar ka seng naduh ki nongialam kiba rim kata naduh u snem 1983 ter ter ka seng ka ieng haka nongrim ban dawa ban pynioh ILP hapoh ka jylla Meghalaya baroh kawei.
Ka CEC ka la shim ia ka rai ba kan ym kynran dien bad pyrshah beit ia ka jingden ia ka wah Umngot namar ka ktah iaki nongshong shnong ka Elaka Darrang bad kiwei khamtam namar ka ktah iaka tnat Tourism hapoh ka jylla bad ki ba im ja na ka wah Umngot kiba rep ba riang harud jong ka wah.
Ka CEC ka ieng skhem ban pyrshah beit ia ka jingleh bor ka sorkar jylla ban iarap iaka Star Cement ban pynioh Environmental Clearance na ka sorkar kmie wad haba ka sorkar ka tip shai ka ktah iaka wah ka bad ki doh um bad ki khlaw ki btap kum ka Narpuh Wildlife Sanctuary bad Eco Sensitive Zone bad ka jingpynjaboh iaka Wah Lukha.
Ka CEC ka lah rai ruh ban dawa na ka sorkar ban wanrah ia ka tnat pule kaba biang hapoh ri lum Jaintia, ban dawa ban wan rah ia Extension Building jong ka Kiang Nangbah Governmeent College bad skul sorkar ha East Jaintia Hills bad ka seng ka dawa ba dei ban shna noh iaka Civil Hospital hopoh East Jaintia Hills District.
Haba ai jingkren u samla Jersom Shylla u la ong ba ka seng ka ieng ha ka nongrim kaba skhem halor kino kino ki mat jingdawa bad ka seng kan ym pyndem da lei lei ha khmat ka sorkar na bynta kaba bha ia ka jaitbynriew baroh ka wei.
U samla Treibor R Suchen ha ka jingkren ka jong u, u la ong ba ka seng JSU kadei ka seng kaba la pynmih shibun ngut ki nongialam bad ki riew ba stad bad shemphang hapoh ka imlang ka sahlang bad u lah ong ka JSU haduh mynta ki paitbah bad jaitbynriew ki dang shaniah iaka hynrei ka jingbun palat kiwei ki seng ha ri lum Jaintia ka pynkulmar jingmut ia u paitbah ka jylla bad ki nongshong shnong ka ri lum Jaintia. U la ai mynsiem ia ki dkhot ka CEC da kaba ong ,”Trei shitom ban tynrong iaka jaitbynriew khlem da kwah burom bad u Blei un sa theh sei ia ka jingkyrhu ha ngi iwei iwei pa iwei na bynta ki kam ba bha kaba ngi lah leh”.
