Ka ophis Sankur kaba deit peit ïa ka ïew Mawkyrwat ha ryngkat ki kynhun seng bhalang ka shnong Mawkyrwat ki seng longkmie, VDP bad Seng samla shnong ha ryngkat ka ophis jong u DSBM Mawkyrwat South west Khasi Hills District mynta ka sngi kila pynlong iaka jing pynkhuid iaka iew Mawkyrwat bad baroh ki sawdong sawkun jong ka iew khnang ban wanrah biang iaka khuid ka suba bad ka jingsngew shngaiñ hapoh iew Mawkyrwat.
Ha kane ka sngi la pynlong ruh ka jingpynshai paitbah iaka khuid ka suba bad la khot la wer ia u paitbah nongshong iew bad nongwan iew ba kin ia trei lang ban pynkhuid iaka iew ka hat khnang ba kan long kaba jop.
Ka sankur bad ka shnong Mawkyrwat haka jingiatreilang bad ki sengbhalang ha kane ka jingialang ba lyngkot kala pynsngew paitbah ba ban lait naka jingma bad naka jingkhapngiah jong ka surok kan sa don ka jingpynkylla iaki nongshong iew kiba ju shong ha rud surok ba kan sa pynkynriah noh sha kawei ka jaka khnang ba kan ym thud iaka iaid ka ieng jong ki paitbah kum juh ruh iaki khynnah skul, namar kum ba long mynta katei ka surok kaba dei ban iaid ki kali bad ki briew kala long kaba khapngiah bad ka buh jingma iaki nong iaid nongieng khamtam iaki khynnah skul namar ka jingdon jong ki nongdie surok.
Katba ia mynta ym pat shem la kdew iaka jaka naka bynta ki nongshong madan namar iaka jaka mynta ka dang don haka jingpynkhreh bad tad ynda katei ka jaka kala long kaba la bit la biang yn sa pynkynriah noh pat iaki nongshong madan ha katei ka jaka bala pynkhreh naka bynta jong ki.
