Ka Jaintia Career Coaching Centre (JCCC) kan sdang noh ia ka jingai jinghikai ba khlem jingsiew ne ka Free Coaching Class na ka bynta ki eksam Meghalaya Public Services Commission (MPSC) bad District Selection Committee (DSC) ha ka Centre jong ka kaba don ha Moomon, Mihmyntdu pyrshah ka ophis DTO, Jowai.
Hashwa ban pynlong ia kane ka jingai jinghikai, kan sa don ka jingplie paidbah ia ka da u MLA ka Jowai u ma Wailadmiki Shylla ha ka 7 tarik Jymmang, 2022 ha ka por 1:30 nohphai sngi, ka ban long ha Community Hall jong ka Dorbar Shnong Ladthalaboh Jowai.
Ka JCCC ka la dep shwa ban pynlong ia ka Entrance Test na ka bynta kane ka Free Coaching ha ka 8 tarik jong u Iaiong 2022, ha kaba ki nongiakhun kila don haduh 412 ngut, bad na kine la shah jied 100 ngut ban ioh ia kane ka Free Coaching. Ka Jaintia Career Coaching Centre ka angnud ba ki khun samla jong ka District bad ka jylla hi baroh kawei kin ialeh shitom bad ban minot bha ha ka jingpynkhreh jong ki ia kino kino ki Eksam kum ki eksam wad kam wad jam ne ki eksam ban leit pule khnang ba kan long ka jingmyntoi ia ki.
Shuh shuh ka JCCC ka ong ba ka jingpynkreh ia ki Competitive Exam kan pyniar ia ka jingmut jingpyrkhat jong ki khun samla bad kan iarap bha ia ki ban ioh da kiwei pat ki jaitkam wat lada kim lah ban pass ha ka ekasm ba ki thrang ban pass. Ka jingpyn khreh ia kum kine ki jait eksam kan ai shibun ki jintip bad ka jingnang jingstad ha kaba iadei ban ka imlang sahlang bad ha ki liang baroh hi. Kumta ka JCCC ka kyrpad ia ka sorkar ban pynshlur ia ki samla ban iakhun ia kino kino ki Competitive eksam kiba dei jong ka State bad jong ka Central ruh kumjuh.