Ka Synjuk ki Nonghikai Meghalaya Upper Primary School Teachers Association (MUPSTA) Central Body ka la pynlong ia ka Central Executive Committee (CEC) ha ka tarik 08.12.2021 ha New Hope Restaurant, Bariki, Shillong bad da kawei ka jingmut ka la shim ia ka rai ban pynlong noh da ka jingiakhih da kaba shongkyllain myngngor (Sit- in- Demonstration) ha ka tarik 17.12.2021 ha Rud Surok All India Radio, Shillong (Opposite Governor Office Shillong) naduh ka por 11.AM. Kane ka jingiakhih da ka ba shong kyllain myngngor ka long ban pynpaw ia ka jingbym sngewhun jong ka seng ia ka jingleh klet jong ka sorkar ia ki jingdawa ba shongnia jong ka seng kata ban kyntiew deficit noh ia baroh ki 844 tylli ki Adhoc Upper Primary School ha Meghalaya baroh kawei.
Kum ban shu pynkynmaw hangne, ha ka jingshisha ka sorkar ka la dep ban kular ban kyntiew deficit noh ia ki tei ki skul ha ka Teachers Conference kaba la long ha Asanang, Tura, West Garo Hills ha u snem 2018 hynrei haduh mynta mynne ym pat iohi dak eiei ruh em ba ka sorkar kan shimkhia ia kitei ki jingeh jong ki nonghikai skul. Ka Seng kan ym pdiang da lei lei ruh ia ki jingkren lap lah jong u Myntri ka tnad Education bah Lahkmen Rymbui ban shu ong beit ba ka Sorkar kam lah ban kyntiew deficit ia baroh ki 844 tylli ki Upper Primary School ha Megjalaya. Kumta, ka seng ka kyrpad ia baroh ki nonghikai Upper Primary skul ki ba don ha Meghalaya ki ba don ha ka shatri jong ka MUPSTA baroh kawei ba kin sngewbha ban ia mih ryntih ha ka tei ka sngi khnang ba ka sorkar kan iohi shisha ia ka jingshem jingkordit bad ba shem jingeh jong ki nonghikai bad donkam ia ka jingiarap ba kyrkieh jong ka sorkar ban ia im lem kum kiwei ki para nongtrei. Pynkut ka kyrwoh ba la phah da u ma E.G War Organising Cum Publicity Secretary MUPSTA Central Body.