Ka Jaiñtia National Council (JNC) Central Executive Committee haka kyrwoh na u Publicity Secretary sengkmie u bah Mebanteilang Sukhlaiñ kum shi bynta ka jingïaid lynti ka jong ka ban sdang noh ïa ka Save Jaiñtia Mission kaba dang shu dep pynbna Paidbah haka 14 tarik u December 2024 kaba don haduh 5 tylli ki mat jingdawa.
Kine ki mat ki kynthup ban pynkhlaiñ ïaka JHADC, ban dawa pynrung ïaka ktien Jaiñtia haka State Launguage Act ka jylla bad ban pynrung ruh haka jingrwai Anthem ka Jylla, ban dawa pynshna noh ïaka Policy thymmai ne ka rukom thungkam thung jam haki kharkhana dew bilat, ban dawa pynbeit noh ïa u pud u sam hapdeng ka Jaiñtia hills bad ka Assam da kaba pynshong nongrim ïaka PRE 1951 Jaiñtia Hills Map bad kaba khatduh ban dawa pynshna noh ïaka Small Scale Coal Mining Policy.
Hapoh kane ka mission ruh ka seng kala dep ban thaw ïa kawei ka tnad treikam jong ka, ka ban sa tip kum ka Employment Commission kaban peitngor ïaka rukom thungkam thungjam jong ki Company ne ki kharkhana dew bilat kiba don ha baroh kawei ka Jaiñtia Hills khnang ba ka rukom thungkam kan ym long kaba theh shiliang bad kane ka Commission ruh kan sa leit shen ban khynra ruh ïaki kot ki sla jong ki briew kiba nabar kiba trei beaiñ ha kine ki kharkhana.
Ïa kane ka save Jaiñtia Mission ka seng kan sa sdang noh ban ïaid lynti bad ban ai jingshai sha u paidbah da kaba yn pynlong ïaka jingïalang Paidbah ha sor Jowai ha Iawmusiang ha kane ka 15 tarik u January, 2025 bad yn pynshai ruh ïaka jingmut ka seng hakaba ïadei bad ka jingthaw ïakane ka mission.
Ka seng da kane ka kyrwoh ka phah sha phi ki khun ki hajar ka bri u Hynñiewtrep Hynñiewwasa bad ka pan ruh ïaka jingkyrshan kaba pura ban kyrshan lem ïaka seng bad kane ka mission ruh da kaba ïadon ryngkat lem bad ka seng ha kata ka sngi 15 tarik ka jingïalang khnang ba ki jingmut kiba bha bad na ka bynta ka jingmyntoi ïala ka Ri kan ym long kaba sepei.
Kumta ka khot ka wer ïa ki longkmie longkpa, ki khun samla, ki nongïalam sengbhalang bapher bapher kumjuh ruh ki Nongïalam shnong bapher bapher ba kin sngewbha ban pyllait ïaka por kaba kordor ban ïadon bynta lem bad ka seng bad kan ai mynsiem shi katdei eh naka bynta ban shakri hok ïala ka Ri bad ka Jaidbynriew hi baroh kawei.