Ka ophis jong u Superintendent of Police, West Jaintia Hills ha ka jingpyllait khubor la pyntip ba nangne shakhmat kan don ka jingdaiñ kuna lada lap ïa kino kino ki briew kiba dih duma ha ki jaka paidbah.
Kane ka long shi bynta ban pyntreikam ïa ka kyndon 4 jong ka aiñ Cigarettes and Other Tobacco Products Act, 2003 (COTPA) kaba mana ïa ka jingdih duma ha ki jaka paidbah bad lada lap ïa kiba ïaleh pyrshah yn pynshitom da kaba daiñ kuna T.200/- (Ar spah) tyngka.
Shuh shuh la ïathuh ruh ba katkum ka kyndon ba 6 (a) kala khang ïa ka jingdie ïa Cigarettes bad kiwei de ki kynja duma sha ki khynnah kiba dang hapoh ka rta kaba 18 snem. Katkum ka kyndon 6 (b) kane ka khang ïa ka jingdie ïa ki duma hapoh ka jingjngai kaba 100 yard lane 300 phut na kino kino ki skul ne jaka pule.
Kumta u SP ka District ula ïathuh ba kino kino kiba leh pyrshah yn pynshitom kat kum ki kyndon aiñ.