Ïaid rally ki nongkyrshan ka NPP na Wahiajer shaduh Ummulong
Ka jingïalap Election ba khadduh jong u ma Sniawbhalang Dhar u kyrtong ka NPP na ka 1-Nartiang Constituency kala kut mynta ka sngi Saitjaiñ ha ka shnong Wahiajer West Jaiñtia Hills, bad ha ka jingai jingkheiñ jong ki nongïalam ka party kila kam ba ka jingwan poi jong ki nongkyrshan kala kot palat ïa ka 25 hajar ngut.
Hashwa ka jingïaid rally kaba dei ruh ka sein ba nyngkong hapoh ka Constituency ban pynlong kum kane ka jingïaid paidbah na Wahiajer haduh Ummulong, kala don ka jingïalang ha madan Ei-ïadaw rong ha shnong Wahiajer bad ïa ka jingïalang la pynïaid da u ma Hamkom Khynriam, President ka NPP 1-Nartiang Block.
La sdang ïa ka jingïalang da ki jingduwai na u ma T. Shullai bad la ïoh ruh ka jingkren na u CEM ka JHADC ma Thombor Shiwat, MDC ma Jesse Suiam, ma Paia Dhar, ma Yooshida Nongspung, ma Damon Dkhar, ma Mutshwa Thabah nalor kiwei de.
Baroh ki nongkren kila pynpaw ïa ki kam ba bha kiba u MLA ka 1-Nartiang Constituency ma Sniawbhalang Dhar ula synñiang ha kiba bun ki liang naduh ki surok, ki jaka sumar, ki ïew ki hat, ki jaka pule bad kiwei kiwei de ki kam pynroi hapoh jong ki shnong ki thaw ka Constituency.
Ha ka juh ka por kila kyntu ïa ki paid nongkyrshan jong u ma Sniawbhalang Dhar ha kane ka kynti ba kin ai biang ka jingkyrshan ba pura da kaba pynjop don burom ïa u, kila ong kumba ïohi mynta ki kam jong u kiba la kren kham jam bad da ka jingkyrmen ha kane ka san snem ban wan shibun ki jingkylla ki wan hapoh ka Constituency.
Katba na ka liang u ma Sniawbha ha ka jngkren ula ong naduh ba sdang jong ka jingleit ïalap election ym don kano kano ka jingthut bad u ai ka jingïaroh ïa ki President bad ki Secretary Unit hapoh jong ki 72 tylli ki shnong kiba la ïadonlang ban ai jingkyrshan ïa u bad ka jingwan jong ki nongkyrshan mynta ka sngi dei da ka jingkitkhleih jong iwei paiwei.
Ula pynsngew hadien ka 2 tarik kumba ki nongkyrshan kila angnud “yn sa shad kmen haduh ban da tdem hi pum bad ki kam ruh ki trei ha ban da tdem pum”, kumta kyntu ïa ki paidbah ban mih dang step ha ka 27 tarik bad leit thep ïa ka vote ha ka shap jong ka NPP.
“Ka 1-Nartiang kan dei ka Constituency ka ban thaw syndon ïa ka record kaba nyngkong hapoh ka jylla ha ka jngïadei bad ka jingjop bun vote tam u nongjop na kane ka Constituency” kam u ma Sniawbha.
Hadien kane ki paidbah baroh kila shim bynta lang da ka jingshong shit ban ïashad ïakmen ha ka jingïaid Rally (road show) naduh ka jaka ba pynlong jingïalang ha shnong Wahiajer haduh ban da poi ha Ummulong.