Ka Meghalaya State Olympic Association (MSOA) hapoh ka jingialam jong u Bah John F.Kharshiiing (Working President), bad Bah Finely L.Pariat General Secretary) ki dang pynkhreh shait shait mynta na ka bynta ka jingiakob mareh kaba heh tam ha ka Jylla ia kaba la tip kum ka “3rd Sohra International Half Marathon 2024″ ka ban long ha ka 21 Nailur mynta u snem.
Na ka liang ka MSOA ka la pynpaw ia ka jingkmen ba palat 1000 ngut ki la dep ban pynrung kyrteng (Register) na ka bynta ban iashim bynta ha kane ka jingiakob. Ka MSOA ka pyntip ruh ba kino kino kiba thmu ban iashim bynta kin pyndep noh kham kloi namar mynta ka MSOA ka pdiang tang 4000 ngut ki nongiashim bynta.
Kane ka snem kan long ruh kaba kham kyrpang namar 2 ngut ki khlur mareh ba paw, kynthup ia u Wycliffe Nyagotuga Juma bad Eliakim Kiplimo Cheruiyot bot kiba la jop ia ka LINZ Marathon Austria bad ka Kenya Standard Chartered ki la pyntikna ban wan iashim bynta.
Na ka bynta kiba don jingmut ban ïashim bynta ha kane ka jingïakob lah ban pynrung kyrteng ïalade lyngba ka (online) website jong ka MSOA (https://meghalayaolympicassociation.com/marathon-run) lah ruh ban pynrung kyrteng lyngba ka offline, kata ha ka Ophis jong ka MSOA ha JN Stadium & Sohra Shop hajan Petrol Pump, Lad Thanad. Ka tarik khatduh na ka bynta ban phah ïa ki kyrteng ka long ha ka 10 Nailur 2023.
Ha kane ka jingïakob mareh, yn don 3 tylli ki thup (Category), kynthup ïa ka elite group (shynrang bad kynthei), Meghalaya-specific na ka bynta kiba 45-haduh 55 snem ka ‘rta, na ka bynta kiba la 55 snem shajrong bad na ka bynta kito kiba kwah ban ia mareh sngewbha (Fun run).
Ki nongjop ha kane ka jingiakhun kin ïoh ïa ka song pisa ryngkat ki takma. Ka jingsam ia ki t-shirt bad nomber bib kan long ha ka 19 bad 20 jong u bnai Nailur ha madan Jawaharlal Nehru stadium kaba don ha Polo Shillong.
Na ka bynta ki jingtip ba kham bniah, lah ban phun ha u nombor 9774279743.