Ka jingapkhmih lynti kaba la slem jong ki nongshong shnong ka thaiñ Namdong ban ioh ia la ka jong ka Block ne ka Community & Rural Development Block kan sa urlong noh ha ka 21 tarik mynta u bnai, ha kaba u Chief Minister ka Jylla u Conrad K Sangma un sa wan ban plie paidbah ia katei ka Namdong C&RD Block ha shnong Namdong, West Jaiñtia Hills District.
Ka thaiñ Namdong ka dei kaba iatyngkhu pud bad ka ka Jylla Assam, ha kine ki por ki nongshong shnong ki shem jingeh ban leit pyndep ia ki kam ki jam kiba iadei bad ka roi ka par shaduh sha Thadlaskeiñ Block namar ba kila kham jngai na kane ka Block. Kumta kane ka jingioh ia la ka jong ka Block kan pynsuk shibun ia ki nongshong shnong ka thaiñ ban iadeikam bad ki tnad sorkar bapher.
Ha katei ka sngi ban plie ia kane ka Block la khmih lynti bad u Myntri ba dei peit ia kane ka tnad (C&RD) u bah Hamletson Dohling un iadon ryngkat, u ma Sniawbhalang Dhar, Myntri pynroi Sor, kam jngohkai pyrthei ha kajuh ka por u MLA jong ka thaiñ ruh un iadonlang, kumjuh ka jingiadon ryngkat jong u Deputy Commissioner ka West Jaintia Hills District bah B.S. Sohliya, IAS lem bad ki shahep sorkar bad ki riewpawkhmat ka thaiñ bad kiwei de.
Ha kane ka juh ka sngi kan don ruh ka jingkyntiew kyrdan iaka Namdong CHC, ka jingbuh mawnongrim ban sdang ia ka jingpyntrei ia ka Greater Mukhnang Lumrot Water Supply Scheme, bad ia ka jingpyntrei ia u surok Jowai Nartiang Kdiap Khanduli Road (JNKK).
Ia ka jingialang paidbah yn pynlong ha madan ialehkai Madan Sari, jong ka shnong Namdong-B.