U ma Wailadmiki Shylla ha ka jingialap elekshon jong u ha shnong Mookyrdup, Jowai kaba la long ha ka miet 11 tarik mynta u bnai, ula pynsngew sha ki paidbah ba u don ka jingthrang ban wanrah sa kawei ka College sorkar ha nongbah Jowai, namar u iohi ia ka jingeh kaba khraw kaba ki samla pule ki ia kynduh ha kine ki snem kiba la dep.
Haba kren shaphang ka College Sokar u ma Wailad ula ong ba ha kine ki khyndiat snem ula iohi shisha ia ka jingeh kaba ki samla ki ia kynduh ha kaba iadei bad ka jingiohrung klas ha ki College hadien ba kila pyndep ia ka Matric ne ka Class 12 jong ki.
U ong ba bun-bun sien na ka liang jong u kum u nongmihkhmat ula shu hap ban pynbor ia ki bor pyniaid jong ka Kiang Nangbah Govt. College ne kiwei de ki jaka pule sorkar ban pdiang jubor ia ki samla pule wat la ki seat kila khapngiah ruh, khang ba ki samla kin ioh ban bteng ia ki jngpule jong ki.
Dei halor kane ka nongrim ba lada un dang wan biang ha ka bor ula buh ia ka thong ban wanrah khlem pep sa kawei ka College sorkar, khnang ban pynsuk ia ki khun samla kiba nangbun nangbun katba nang mih ki snem.
U ma Wailadmiki ula ong sa kawei kaba u idonkam bha ban don ha nongbah Jowai ka dei ka jaka sumar sorkar (De-addition Rehab Centre) na ka bynta kito ki khun samla shynrang bad kynthei kiba la ngop ha ki jingdih pynbuaid ba bun jait.
U la ong ruh ba ka koit ka khiah ka long kaba donkam bha, kumta u la sngewdei ban pynbha shuh shuh ia ka District Civil Hospital da kaba yn kyntiew kyrdan noh ia ka shaduh ka State Hospital, khnang ba yn nang lah shuh shuh ban pynbiang ia ka jingdonkam baroh katkum ka jingdawa.
Ha kane ka jingialap elekshon u ma Wailad ula pynpaw ruh ba u thrang ban pynkiew ia ka sap ka phong jong ki khun samla, khamtam ha kaba iadei bad ka jingshna ia ki phlim lajong. Kumta ula ong ba un sa shna ia ki Cinema Hall kiba iadei dur katkum kine ki juk ba mynta. “Ha kine ki Cinema Hall yn ym shah ban pyni ia ki wei pat ki jait phlim kiba na shabar, hynrei ban pyni ia ki phlim lajong (Khasi-Pnar”) ban pynmyntoi ia ki nongshna phlim, la ong u ma Wailad.
Ha kane ka janmiet u ma Wailad ula pynsngew shibun ki kam pynroi kiba ula wanrah hapoh ka Constituency hapoh ki samoi treikam jong u kum u MLA bad ula kular ruh ban pyndep sa ia kiba dang sahteng.
Kumta u khot bad kyrpad ia ka jingkyrshan jong ki nongshong shnong bad ki khun ka 2-Jowai Constituency baroh ba kin ai biang ka jingkyrshan ia u, sa ha kane ka kynti khnang ba un lah ban pyndep ia kiba bun ki jingthrang jong u, na ka bynta ka bha ka miat jong ka Constituency bad ka jylla hi baroh kawei.