Sa shisien pat kum ka jingkynjoh sha ka thong ban ym pyndonkam ia ki kotsada (papers) hapoh ka ïing Dorbar thawaiñ ka jylla (Meghalaya Legislative Assembly) na ka liang jong u Myntri Rangbah ka jylla u Conrad K Sangma un sa wanrah ia ka jingkren halor ka Budget Estimate na ka bynta ka snem 2024-25 ha kane ka Dorbar Mang tyngka ban sa long tang da kaba pyndonkam da ki kor computer (digitals).
Ia ka jingkren (Budget Speech) jong u Myntri Rangbah yn buh ha ka website jong ka National eVedhan Application https://neva.gov.in/Home/NeVA bad ha ka website jong ka Meghalaya Legislative Assembly : https://megassembly.gov.in/.
Ki dkhot jong ka Meghalaya Legislative Assembly kin lan ban peit ia kane ka jingkren da kaba pyndonkam da ki tablets (Computer) kiba la pynioh hapoh ka ïing Dorbar.
Ki nongtrei jong ka IT Cell jong ka Meghalaya Legislative Assembly Secretariat ha ka jinglamkhmat jong u Computer Programmer bah Dapborlang Marwein mynta ka sngi kila ai jinghikai ia u Myntri Rangbah ka jylla u Conrad K Sangma kumno ban pyndonkam ia kane ka National eVidhan Application.
U Dr. Andrew Simons, Commissioner & Secretary of the Meghalaya Legislative Assembly Secretariat, ula pyntip ba kane ka jingpyrshang kan ialam sha ka jingthmu ban pynlong ia ka ïing Dorbar jong ka jylla ban treikam khlem ka jingpyndonkam ia ki kot ki sla.
Haba sdang jong kane ka Dorbar yn pynduna bha ia ka jingprint lyngba ki kotsada ia ka list of business, ki questions, motions, resolution bad kiwei kiwei de, hynrei ia kine baroh yn buh ne thep beit ha ka website jong ka NeVA bad ha ka website jong ka Meghalaya Legislative Assemble.
Yn ai lad ruh ia ki dkhot jong ka ïing Dorbar ban phah ia ki questions bad kiwei de ki notice jong ki lyngba ka app kaba la buh kyrpang na ka bynta jong ki.