U Sajeeb Wazed uba dei ruh u khun bad u nongaibuit jong ka Myntri Rangbah barim ka ri Bangladesh, ka Sheikh Hasina u la pynbna bad pyntikna ba ka kmie jong u kan yn wanphai shuh ha ka kam saiñ hima sima (politics) wat lada ka jinglong jingman ha katei ka ri kan thanda noh ha ki sngi ban wan.
Ka Hasina kadei ruh ka MR ba la synshar bun snem tam ha ka ri Bangladesh. Katkum ki tyllong khubor, la ong ba kane ka nongïalam kan iai shong rieh shwa ha India namar haduh mynta ka jingkhluit ha katei ka ri kam pat jah.
Nalor ka jingpynjot pynpra ia ka jaka sah bad ka jaka treikam jong ka ha Dhaka, ki paidbah ki la pynkhyllem bad pynpait ruh ia u mot dur (statue) jong u kpa jong ka, u Mujibur Rahman. Ym tang katta, ki paidbah kiba dang bteng ia ka jingbitar ki la pynjot bad thang ruh ia ka Indira Gandhi Cultural centre ha Dhaka.