Ka la long kumta na ka bynta ka Ri Sohra, kaba khlem don bynta ei-ei ruh nalor kata ka kam jah rngai kita ki shi kurim, u Raja Raghubanshi bad ka tnga shukor jong u, ka Sonam, kiba dang shu dep iathoh shen hana, ha shnong lajong, ha Indore, Madhya Pradesh, kiba la iawan kai sngewbha (kata ka Honey Moon) ba ong u phareng, hynrei kha-ma-kha, ka la shah pynhiar dor ka Sohra, ba la shah pyniap kitei ki shi kurim hangne.
Kum ka ding kaba khaleh, ka la pur lut ym tang ha ri India, lyngba ki lad pathai khubor, hynrei wat shabar ka ri India ruh. Ym tang ba ka pynhiar dor ia ngi ruh kum ka jaitbynriew, hynrei wat ia ki para Khasi kiba don ha kylleng ka pyrthei, kiba la ia kylli da ka jingsngewkhia, balei ka la jia haduh katta ia ki bapli ki shi kurim kiba la wan kai sha ri jong ngi bad kumta ter-ter-ter….
Kitei shi kurim, haba peit te kiba bhabriew shisha baroh arngut, ki phuh bha ruh, namar dang dep iathoh shen, phewse don ka jinglong khongpong hapoh ka dur khmat ka Sonam, ka lok jong u Raja, haba pynshong nia halor ka jingjia; kata ka long, shano ka jah ka Sonam pat, ha ka sngi Nyngkong 2 tarik u June, ha ka sngi ba lap ia ka met iap u lok jong ka da ki pulit na thwei Arliang? Nalorkata, ka shai kdar ba ym dei ba u ur lane hab sha riat, hynrei la lap ruh ia ka tiar kaba la pyndonkam ban tied ia u.
Sa kawei ka mat kaba dei ban tih bha ban lap ia ka jingshisha, ka long, ba uwei u nongialam lynti ia kiba wan jngohkai pyrthei (ki toris), u Bah Albert Pde, ula sakhi ha ki pulit ba ki la don sa 3 ngut kiwei pat ki khar shynrang bym ju iohi, kiba iaiaid lang bad u Raja bad ka lok jong u ka Sonam, haba ki dang kiew na u riat Nongriat sha Mawlakhiat ha ka step 23 tarik Jymmang.
Ki pulit jylla kin ym shem jingeh ban lap ia kine ki 3 ngut, naba kane ka dei ka bynta bakongsan tam kaba iadei bad kane ka jingjia. Ka Sonam kaba dang im, khlem artatien ka tip, kiei kitei ki 3 ngut?
Katkum ki khubor, u Raja Raghuvanshi u wan na ka ing ka sem kaba don-ba em bad ba ym pat da slem eh, ula shimti ban pyniaid ia ki kam khaii jong ka ing ka sem ha jylla jong u ha Madhya Pradesh.
Ha ki khyllah jait, kaba long ka ktien kaba pyndonkam shane, kane ka bynta kaba iadei bad ka spah ka phew, ka la ju pynpait pynpra ing bad ka ju pynmih bun ki jing umsnam bad iap klep ruh. Ha Shillong la ju don teng kum kine ki jingiashrut knieh spah ha ki por ba la leit.
Hap ban iaroh ia ka tnat pulit East Khasi Hills, khamtam ia ka tnat Sohra, na ka bynta ki jingshem jong ki ia kane ka jingjia bad khlem artatien kin sa lap dien, kiei kitei ki 3 ngut kiba la iaid lang bad kitei shijur, ha ka 23.05.2025, na Nongriat sha Mawlakhiat.
Khlem artatien u Albert Pde, tourist guide, un kynmaw beit ia kitei ki 3 ngut bad ban kdew ia ki ha ka sngi ban pynithuh (identification) lada ki pulit ki dang don kam ban don kane ka indentification parade, ban lap ia ki shah suba bashisha lada jia bym pat lap ia ki.
Nga shimet, habym pat ioh ia ka met u Raja Raghuvanshi, nga suba ba lehse dei ki ksuid tynjang, ia kaba nga la don jingkyrmen ruh ba u Raja un sa lait noh hadien katto-katne sngi, kumba la jia ia ngi ha katei hi ka thain ha u snem 2008.
Katei ka jingjia ka la jia ha u bnai February 2008, haba ngi la hiar na Tyrna ban leit sha Nongriat, hynrei bym tip lynti-synkien, la poi slem noh ha trai riat Tyrna, ha i shnong rit Nongthymmai, kumta ngi la iaid kai noh tang hakmat khyndiat, ha ka jingkieng Nar kaba ar.
Ynda la iashang kai katto-katne minit, ngim tip shano ngin leit, shano kata ka Nongriat, namar kawei ka ing ruh ym don, uwei u briew ne u mrad ruh ym iakynduh, ngi rai ban wanphai kylla noh bad ban kiew biang ia u thiep uba ngi la wan hiar, ban poi ha Tyrna, kabym pat don tang iwei i dukan sha ruh ha katei ka por, ym kumba long mynta, ba la dap da ki hotel kat shaba phai.
Ynda la khreh mih noh na katei ka jingkieng nar, ngim poi pyrkhat ba uwei napdeng jong ngi ula jah, ngi mut ula iaid shakhmat ne u dang wan suki nadien. Hynrei ynda la poi ha Tyrna hadien shi kynta tam, lah dum artad ha katei ka por, uta u paralok, u Bah J. Malngiang, ula jah rngai.
La jrem ka met ka phad hynrei ngam banse ban leit phai kylla ban leit wad ia utei u paralok bad arngut ki khynnah samla shnong, bad katto-katne ngut kiba na thain Nongriat kiba dang wan phai na iew Sohra, kiwei ki paralok kim lah iaid shuh.
Ynda la poi ha kata ka jingkieng nar ba ngi la ialeit, nga la iathuh ha kita ki trai shnong ba wan iew Sohra ba utei u paralok u jah klep ha katei ka jingkieng nar.
Ki la iawad ki samla shnong kiba la wanrah bad ki dongmusa, khlem lap shuh ia u, kumta nga la wan phai kylla noh bad kitei ki arngut ki khynnah samla na Tyrna, hadien kata ngi la leit pyntip sha ki pulit Sohra ia kaba la jia.
Ban pynlyngkot, la lap ki trai shnong kiba leit wad ia u man la ka sngi, haduh ka step kaba hynriew, ynda ki ksuid tynjang ki la pyllait ia u hadien 5 miet.
U Bah Malngiang ula iathuh ia katei ka jingjia bad ula im ha ka jingshait-jingkhlain, haduh ba un da khlad noh ha u snem 2023, hadien 15 snem jong katei ka jingjia.
Ia kane ka jingjia ruh, nga la mut ba u Raja ula shah rah suid tynjang kum u Bah Malngiang, phewse kham sngewthuh bad kham hok ki ksuid tynjang ban ia ki ksuid pyrthei ha kane ka juk.
