Ka East Jaiñtia Hills District Football Association (EJHDFA) kala pyntip ba shen kan sdang noh ïaka lympung ïalehkai phutbol ha ka kyrdan 3rd Division jong u snem 2025.
Ha kane ka 3rd Division kiba wan ïashim bynta ki don 38 tylli ki kynhun (team) bad hadien ka jingpynkhalai nusib ïa ki la pynhap ha ki 16 tylli ki Pool. Kiba jop na kawei kawei ka Pool kin ïoh rung sha ka Round-16 ( knockout stage).
La pyntip ba kane ka jingïalehkai kan sdang ha ka 30 tarik u Jylliew, 2025 (Monday) ha madan Artificial Ground Diengshynrum, Khliehriat na ka bynta lai tylli ki jingïakhun ki ban sdang ha ka por 11 baje mynstep ka Teilang SCSC Lummyrlli pyrshah ïa ka Narwan SCSC. Ka Mookhep SCSC pyrshah ïa ka Youngstar SCSC ha ka por 1 baje nohphai sngi, katba ka Tongseng Youth SYSC pyrshah ïa ka Umlong SCSC ha ka por 3 baje nohphai sngi.
