-Ka pisa ba Rs.50 Lak ba la ai jingiarap ïa ka skul ka long ban pynkiew ïa ki kam Sports-
Ka Sorkar Jylla hapoh ka jingialam jong u Myntri Rangbah Conrad K. Sangma hynne ka sngi ka 8 tarik Ïaiong 2025, ki la pynkup burom ia ki khynnah skul Myngken Christian Higher Secondary school, Bhoirymbong halor ka jinglah jong ki ban wanrah burom ia ka Jylla na ka jingleit ïashim bynta sha ka lympung Indo-French Football Tournament ha Paris, France ha une u bnai ba lah dep.
Kane kan dei ruh ka khana ka ban sah pateng ha ka history jong ka jylla ha kaba ka Myngken ka dei ruh ka skul ba nyngkong na ka jylla ban poi ïakhun shabar Ri.
Ha kane ka sngi, da ka jingkmen u Myntri Rangbah ryngkat ka jingiadon lang u Bah Hamlet Dohling President MFA, ki Nongïalam Sorkar ki la pdiang sngewbha ia kitei ki samla, ki nonghikai skul bad u coach kum ka dak ban pynpaw ia ka jingaimynsiem halor ka jingwanrah burom jong ki.
Haba ai jingkren ha kane ka sngi, u Myntri Rangbah u la ong “Kane ka dei ka por kaba pynsngew sarong ia nga bad ia ka Jylla hi baroh kawei. “Phi la ioh ia ka kabu ban mihkhmat ym tang na ka bynta ka skul jong phi, ym tang na ka bynta ka jylla hynrei ia ka Ri sha France. Ym tang ba phi shu leit mih khmat na ka bynta ka Ri hynrei phi la wanrah burom da kaba ioh ia ka kyrdan ba 3 ha katei ka lympung ba heh. Kum ka Sorkar, ka kam ïalehkai hi ka dei kaba Kongsan bha ia ngi ym tang namar ba ngi iohi ba don ki sap hynrei ba donkam ban kyrshan ba ki samla jong ngi kin lah ban ïalehkai bha ha ki lympung kiba hapoh bad shabar jong ka Ri” la ong u Myntri Rangbah.
U Myntri Rangbah u la iathuh ba ka Sorkar ka pynleit jingmut bha ha ka kam ïalehkai barabor bad ka song Pisa Rs.50 Lak ia kaba la kyrshan ia kane ka skul ha ka jingiaid lynti jong ki, kam dei eh tang na ka bynta ban pynlut ha ka jingiakhun sha Paris, hynrei ka dei ka dak ban kyrshan ia ki ha ki lympung ki ban sa wan nangne sha khmat.
