Ka Sutnga SSCC kala bteng ïa ka jingjop mynta ka sngi haka jingïalehkai Super Division Football Tournament-2025 da kaba pynliem ïaka Dhana CSC haka minit ba khatduh lyngba ka penalty.
Ïa kane ka lympung ïalehkai mynta u snem la tip ïaka kum ka 5th Kyrmen Shylla Contribution Trophy, ïa kaba la pynïaid daka East Jaiñtia Hills District Football Association (EJHDFA) ha madan Artificial Turf, Diengshynrum, Khliehriat.
Haba phai sha ka jingïakhun ka Sutnga SSCC kala jop da 2-1 kol ïaka Dhana CSC, ïa ki kol Sutnga SSCC la thep da u Sauni Phawa haka minit ba 13 bad u Niponghi Sumer haka minit ba 90 (Penalty). Katba ïa ka shikol na ka Dhana CSC lathep da u Micheal Siangshai haka minit ba 23.
Sa kawei ka jingïakhun mynta ka sngi hapdeng ka Ladrymbai-B SC bad ka R.Shkenshynriah SC kila poi sha ka jingïakhaid khlem don kiba ïoh ban thep kol (0-0).
