Ka East Khasi Hills CA kala jop da 167 runs ïa ka West Jaiñtia Hills DCA haka jingïalehkai jong ka Under-16 Boys Inter District Cricket Tournament 2025 (Zone-1) kaba la long mynta ka sngi 24 tarik Ïaïong.
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Haba phai sha ka jingïalehkai mynta ka sngi ka la long kaba noh shilliang hapdeng ka EKHCA pyrshah ïa ka WJHDCA, ha kaba ka EKHCA kala jop haduh 167 run. Ïa ka jingkynting toss la jop da ka EKHCA kaba la kam trai ban tied nyngkong.
Ka EKHCA haba wan ban tied nyngkong kala kamai 217 run bad liem lut baroh 10 wickets haka 44.2 overs. U Danlyson Bareh ula long u nongtied ba khampaw mynta ka sngi napdeng ki nongtied jong ka EKHCA da kaba tied marwei 108 runs na ki 100 balls ryngkat bad 19 tylli ki Fours (4s). U Menang Shangpliang pat u la tied 24 runs na ki 30 balls ryngkat bad kawei ka Six (6) bad 3 tylli ki Fours (4s). U Waibhami Ryngkhlem na ka WJHDCA sa shisien u la pyni ïaka sap kawang ball jong u, da kaba khyrwit marwei 5 wickets na ki 9.2 overs
Ka WJHDCA ha ka pali jong ka ban beh ïa ka thong, ki nongtied jong ka ki la kyllon uwei hadien uwei namar ba ki nongkawang ball jong ka EKHCA ki tbit palat ban pynhap ïa ka ball bad kumta kim da lah than ban shna run bad baroh ki lah ban kamai tang 50 run bad hap lut baroh 10 wickets ha ka overs kaba 21.2. U Menang Shangpliang bad u Amit Kumar Rai, ki dei ki arngut ki nongkawang ball jong ka EKHCA kiba ïalehkai bha mynta da ka ba ïoh ban pynhap mar 3 wickest.
Ïa ka nam Man of the Match la ïoh rah da u Danlyson Bareh uba kamai bun run eh na ka EKHCA.
Ka jingïalehkai lashai ka sngi (Friday) 25-04-2025 kan long hapdeng ka SCA ‘B’ pyrshah ïa ka WKHDCA naduh ka por 8 baje shiteng mynstep.
