Ka SCA ‘A’ kala jop da 18 runs ïa ka SWKHDCA haka jingïalehkai jong ka Under-16 Boys Inter District Cricket Tournament 2025 (Zone-1) kaba la long mynta ka sngi 1 tarik Jymmang.
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Ha ka jingïalehkai hapdeng ka SWKHDCA pyrshah ïa ka SCA ‘A’, ïa ka jingkynting toss la jop da ka SCA ‘A’ kaba la kam trai ban tied shuwa. Ka SCA ‘A’ haba leit tied nyngkong, ki nongtied jong ka kila tied 132 runs bad liem lut baroh 10 wickets ha ka overs kaba 27.2. U Krishiv Choudhary ula long tang ma u marwei napdeng ki nongtied jong ka SCA ‘A’ uba paw mynta ka sngi da kaba tied marwei 66 runs na ki 66 balls ryngkat bad 8 tylli ki Fours (4s). U Steviericson Iawphniaw, nongkawang ball jong ka SWKHDCA u la ïoh ban khyrwit marwei 3 wickets naki 5 overs.
Ka SWKHDCA ha ka pali jong ka ban beh ïa ka thong, ki nongtied jong ka kim lah ban pynjop bad ki lah ban kamai tang 114 runs bad liem lut baroh 10 wickets ha ka overs kaba 28.1. Napdeng ki nongtied jong ka dei tang u Sunshinestar Nongsiej uba ïalehkai bha da ka batied marwei 51 runs na ki 70 balls ryngkat bad 9 tylli ki Fours (4s). U Krishiv Choudhary jong ka SCA ‘A’ u ba tied bun run, ula lehkai bha ruh ha ka jingkawang ball da ka ba ïoh ban pynhap 3 wickets na ki 9.1 overs.
Da kane ka jingjop ka SCA ‘A’ ka la pynkut ïaka jingïakhun jong ka ha kane ka Under-16 Boys Inter District Cricket Tournament 2025 bala pynlong da ka Meghalaya Cricket Association bad ka la long balai ha ka Points Table da kaba jop shisien, rem shisien bad ïa sam points ha ki ar jingïalehkai ba pynthut u slap.
Ka jingïalehkai lashai ka sngi, Friday 02-05-2025 kan long hapdeng ka EKHCA pyrshah ïaka EWKHDCA naduh ka por 8 baje shiteng mynstep.
