Ka kynhun ïalehkai jong ka Ummulong CC kala jop da 6 wickets ïa ka Young Lad’s CC, haka jingïalehkai jong ka District Cricket League 2025 bala pynïaid daka West Jaiñtia Hills District Cricket Association (WJHDCA) mynta ka sngi 3 tarik u Jymmang ha Mini Stadium, Khliehtyrshi.
Hashwa ka jingïakhun la rai ïa ki overs lahap ban pynduna na ka 35 sha ka 20 over kaba la sdang naduh mynta ka sngi haduh ba kut jong ka League na ka daw ba u slap u wan pynthut man ka sngi bad ki Teams baroh ki la mynjur ïa kane ka jingpynbeit thymmai ka Association.
Haba phai sha ka jingïalehkai mynta ka sngi ïa ka jingkynting toss la jop da ka Ummulong CC kaba la kam trai ban kawang ball nyngkong. Ka Young Lad’s CC haba leit tied nyngkong kala kamai 110 runs bad liem 7 wickets na ki 20 overs. U Dathrangki Pariat (C) u la lehkai bha mynta ka sngi napdeng ki nongtied jong ka Young Lad’s CC da kaba tied marwei 46 runs na ki 46 balls ryngkat bad kawei ka Six (6) bad 4 tylli ki Fours (4s). U Wellmanson Passah (C) bad u Heimonlang Lyngdoh, nongkawang ball jong ka Ummulong CC ki la ïoh ban khyrwit mar 2 wickets na ki 4 overs.
Ka Ummulong CC ha ka pali jong ka ban beh ïa ka thong, ki nongtied jong ka ki la lah ban pynjop da kaba ïoh 111 runs ha ka overs kaba 17.5 bad hap tang 4 wickets. Napdeng ki nongtied jong ka dei u Aaron Lamare uba lehkai bha da kaba kamai marwei 48 runs (khlem out) na ki 38 balls ryngkat bad ar tylli ki Six (6) bad 6 tylli ki Fours (4s). U Maremdor Sutnga, u nongkawang ball jong ka Young Lad’s CC u la ïoh ban pynhap 2 wicket na ki 3.5 overs.
Ïa ka Nam man of the Match la ïoh rah da u Heimonlang Lyngdoh u nongïalehkai jong ka Ummulong CC uba kamai 22 runs bad ïoh ban pynhap 2 wickets.
Ka jingïalehkai ha ka sngi, Monday 05/05/2025 kan long hapdeng ka Khimusniang SC pyrshah ïaka Evergreen SC&CC naduh ka por 8 baje shiteng mynstep.