Ka Evergreen Mukhla Mission kala jop da 11 runs ïa ka Moodymmai SC, ha ka jingïalehkai jong ka District Cricket League 2025 bala pynïaid daka West Jaiñtia Hills District Cricket Association (WJHDCA) mynta ka sngi 8 tarik u Jymmang ha Mini Stadium, Khliehtyrshi.
Haba phai sha ka jingïalehkai ïa ka jingkynting toss la jop da ka Moodymmai SC kaba la kam trai ban kawang bol nyngkong. Ka Evergreen Mukhla Mission haba leit tied nyngkong bad kala tied 130 runs na ki 20 overs bad liem 9 wickets. U Shoristar Suna ula lam khmat napdeng ki nongtied jong ka Evergreen Mukhla Mission da kaba ula tied marwei 58 runs na ki 51 balls ryngkat kawei ka Six (6) bad 7 tylli ki Fours (4s). U Bichar Lamare, nongkawang ball jong ka Moodymmai SC ula ïoh ban khyrwit 4 wickets na ki 4 overs bad u Rijest Lytan pat u la ïoh ban pynhap 3 wickets na ki 3 overs.
Na ka daw ka jingpynthut u slap, ïa ka thong la hap ban pynduna sha ka 116 runs na ki 17.2 overs da kaba pyndonkam da ka DLS Method.
Ka Moodymmai SC haka pali jong ka ban beh ïa kane ka thong, ki nongtied jong ka kim lah ban pynjop bad ki lah ban kamai tang 104 runs na ki 17.2 overs bad duh noh 8 wickets. U Levestar Phawa u la kamai marwei 32 run na ki 24 balls ryngkat iwei i Six (6) bad 4 tylli ki Fours (4s), u Pyndap Lamin pat ula tied 17 runs na ki 13 ball ryngkat 4 tylli ki Fours (4s).
U Kamkini Sari, nongkawang bol jong ka Evergreen Mukhla Mission ula ïoh ban pynhap 3 wickets na ki 4 overs bad ula ïoh ban khur ïa ka Nam Man of the Match.
Ka jingïalehkai lashai ka sngi Friday, 09/05/2025 kan long hapdeng ka Mupliang SC pyrshah ïa ka North East A.U. (ATS) naduh ka por 8 baje shiteng mynstep.
