[U Deibormi Rngd Captain ka Lion S&YA uba ioh ia ka nam Maw of the Match]
Ka kynhun ïalehkai jong ka Lion S&YA kala jop da 162 runs ïa ka Khimusniang SC ha ka jingïalehkai jong ka District Cricket League 2025 bala pynïaid da ka West Jaiñtia Hills District Cricket Association (WJHDCA) mynta ka sngi 24 tarik ha Mini Stadium, Khliehtyrshi.
Ka jingïalehkai mynta ka sngi kala long kaba noh shilliang hapdeng ka Lion S&YA pyrshah ïa ka Khimusniang SC, ha kaba ka Lion S&YA kala jop haduh 162 runs. Ïa ka jingkynting toss la jop da ka Lion S&YA kaba la kam trai ban tied shuwa. Ka Lion S&YA haba leit tied nyngkong kala kamai 253 run na ki 35 overs bad liem 4 wickets.
U Nick Dan ula long u nongtied ba paw bha mynta ka sngi napdeng ki nongtied jong ka Lion S&YA da kaba tied marwei 100 runs (khlem out) na ki 76 balls ryngkat bad hynriew tylli ki Six (6s) bad saw tylli ki Fours (4s). Kiwei pat ki ba la noh synñiang haka jngtied ban pynheh ïaka thong ki long u Firstborn Son Dkhar 41 (35), u Deibormi Rngad (C) 29 (24) bad u Tammiki Tariang 27 (55). U Nibiangmon Sutnga, nongkawang ball jong ka Khimusniang SC ula ïoh ban pynhap 2 wickets na ki 7 overs.
Ka Khimusniang SC ha ka pali jong ka ban beh ïa ka thong, ki nongtied jong ka ki la kyllon uwei hadien uwei namar ba ki nongkawang ball jong ka Lion S&YA ki tbit palat ban pynhap ïa ka ball bad kumta kim da lah than ban shna run bad baroh ki lah ban kamai tang 91 runs bad duh lut baroh 10 wickets ha ka over kaba 20.4.
Napdeng ki nongtied jong ka Khimusniang SC dei tang u Ebormi Sutnga uba la ïoh 18 (11), u Mebanroy Bamon 16 (29) bad u Nibiangmon Sutnga 14 (22) kiba lah ban kamai ar digit.
U Deibormi Rngad (C), nongkawang ball jong ka Lion S&YA ula lehkai bha haka bowling da ka baïoh ban pynhap 5 wickets na ki 6.4 overs bad u la ïoh khur ïa ka nam Man of the Match.
Ka jingïalehkai lashai ka sngi Friday 25/04/2025 kan long hapdeng ka Mupliang SC pyrshah ïa ka West Jaiñtia Police CC naduh ka por 9 baje mynstep.
[U Nick Dan uba lah ban kamai haduh 100 runs na ka Lion S&YA ha ka jingialehkai mynta ka sngi]