Ka Mupliang SC kala jop da 9 wickets ïa ka NEAU CC (ATS), haka jingïalehkai jong ka District Cricket League 2025 bala pynïaid da ka West Jaiñtia Hills District Cricket Association (WJHDCA) mynta ka sngi 9 tarik u Jymmang ha Mini Stadium, Khliehtyrshi.
Haba phai sha ka jingïalehkai mynta ka sngi ïa ka jingkynting toss la jop da ka Mupliang SC kaba la kam trai ban kawang bol nyngkong. Ka NEAU CC (ATS) haba leit tied nyngkong kala tied tang 63 runs bad liem lut baroh 10 wickets haka overs kaba 14.3. U Arman B Marak, 17 runs (khlem out) bad u Alban Presley R Sangma, 16 runs kila long tang ma ki ar ngut napdeng ki nongtied jong ka NEAU CC (ATS) kiba lah ban kamai ar digit. U Defender Dhar (C), nongkawang ball jong ka Mupliang SC ula ïoh ban khyrwit marwei 5 wickets na ki 4 overs.
Ka Mupliang SC ha ka pali jong ka ban beh ïa ka thong, ka la lah ban pynjop suk da kaba ïoh 65 runs na ki 11.1 overs bad duh tang 1 wicket. U Mewan Phawa ula tied 21 runs (khlem out) na ki 34 balls ryngkat 2 tylli ki Fours (4s), u Oniwanker Sna pat ula tied 16 runs (khlem out) na ki 14 balls rygkat 3 tylli ki Fours (4s) bad u Byforcestar Dhar ula tied 16 runs na ki 19 balls ryngkat 2 tylli ki Fours (4s). U Achigrim W Sangma, nongkawang bol jong ka NEAU CC (ATS) ula ïoh ban pynhap 1 wicket na ki 1 overs. U Defender Dhar jong ka Mupliang SC uba ïalehkai bha ha ka jingkawang bol u la ïoh ban khur ïa ka Nam Man of the Match.
Da kane ka jingjop, ka Mupliang SC kala long ba ar ha ka Points Table jong ka Pool A da kaba jop saw sien na baroh 5 tylli ki jingïakhun bad ïoh 8 Points, ka NEAU CC (ATS) pat ka jop tang shisien bad rem saw sien na ki 5 tylli ki jingïakhun bad ka long ba san ha ka Points Table jong ka Pool A.
Ka jingïalehkai lashai ka sngi Saitjaiñ, 10/05/2025 kan long hapdeng ka Phramer CC pyrshah ïa ka Khliehtyrshi SC naduh ka por 8 baje shiteng mynstep.