Ka Wahiajer SC kala long ka nongjop ha ka jingïalehkai jong ka District Cricket League-2026 kaba la long mynta ka sngi 20 tarik u Lber 2026, bala pynïaid da ka West Jaiñtia Hills District Cricket Association, katba ka Ummulong SC bad ka Khimusniang CC kila ïasam mar shi point.
Ha ka jingïalehkai ha Wahiajer Mini Stadium, ka Wahiajer SC kala jop da shi wicket ïa ka Dulong CC ha ka jingïakhun kaba itynnad bha.
Ka Wahiajer SC kala jop ïa ka toss bad ka la jied ban kawang bol nyngkong. Ka Dulong CC, haba tied nyngkong, kala kamai 124 run na ki 25.4 over bad ka la hap lut baroh ki wicket. U Bhawotki Paswet ula long uba kamai bun run da kaba tied 40 run na ki 66 bol (6 tylli ki 4 run), katba u Ram Toi u la pynbud da 23 run na ki 33 bol (4 tylli ki 4 run).
Na ka liang ki nongkawang bol jong ka Wahiajer SC, u Heimon Dkhar ula lehkai bha da kaba pynhap 4 wicket na ki 5 over, katba u Mebanker Suting u la shim 3 wicket na ki 5.4 over.
Haba beh ïaka thong ka Wahiajer SC kala lah ban kynjoh ïa ka thong da kaba kamai 125 run na ki 32.1 over bad hap 9 wicket. U Hillel Susngi u la long uba ïoh bun run da kaba tied 28 run na ki 42 bol (3 tylli ki 4 run), katba u Heimon Dkhar u la pynbud da 19 run.
Na ka liang ki nongkawang bol jong ka Dulong CC, u Heimonmi Kyndiah ula shim 4 wicket na ki 7 over bad u Pher Ki u la ïoh 3 wicket.
Ïa ka nam Man of the Match la ïoh da u Heimon Dkhar na ka (Wahiajer SC).
Katba ha ka jingïalehkai ha madan Khliehtyrchi Mini Stadium, ka Ummulong SC bad ka Khimusniang CC kila ïasam mar shi point. Watla ka Ummulong SC kala jop ïa ka jingkynting pisa bad ka la jied ban tied nyngkong, hynrei ka jingïalehkai kala shah pynthut noh ha u slap.
Ka Khimusniang CC ka la ïoh tang 14 over ban kawang bol shwa ban pynsangeh ïa ka jingïalehkai. Kumta, da ka jingïamynjur lang jong ki Umpire bad ki Captain, la rai ban pyndam noh ïa ka jingïalehkai bad ban ïasam mar shi point.
Ki jingïalehkai lashai ka 20 tarik u Lber 2026 ka long hapdeng ka Moodymmai SU SC pyrshah ïa ka Ummulong B – ha Khliehtyrchi Mini Stadium, katba ka Chutwakhu SC pyrshah ïa ka Riwar Titan CC –ha Wahiajer Mini Stadium haka por 9 baje mynstep.
