Ka Young Lads CC bad ka PCC Phramer kila long ki nongjop ha ka jingïalehkai jong ka District Cricket League-2026 kaba la long mynta ka sngi 19 tarik u Lber 2026, bala pynïaid da ka West Jaiñtia Hills District Cricket Association ba la pynlong haki ar tylli ki jaka.
Ha ka jingïalehkai kaba long ha Khliehtyrchi Mini Stadium, ka Young Lads CC ka la jop da 5 wicket ïa ka Khliehtyrchi SC.
Ka Khliehtyrchi SC, hadien ba ka la jop ïa ka jingïatoss, ka la jied ban tied nyngkong hynrei ka la shah pynhap lut baroh ki wicket hadien ba ka la kamai 110 run ha ki 25.1 over.U Ibormiky Suchiang u la long uba kamai bun eh da kaba tied 25 run na ki 27 bol (2 tylli ki 6 bad 2 tylli ki 4), katba u H. Timi Ryngkhlem (C) u la pynbud da 20 run na ki 38 bol.
Na ka liang ki nongkawang bol ka Young Lads CC, u Namewanki Pakyntein (C) u la khur 5 wicket na ki 5.1 over, katba u Heiyomiki Ryngkhlem u la ioh 3 wicket ha ki 7 over
Haba beh ïa ka thong, ka Young Lads CC ka la lah ban kynjoh ïa ka thong bad jop da 5 wicket.U Dathrangki Pariat u la tied 26* run na ki 50 bol (5 tylli ki 4), katba u Namewanki Pakyntein u la pynbud da 14* run. Na ka liang ki nongkawang bol ka Khliehtyrchi SC, u Khimti Dkhar u la ïoh 3 wicket ha ki 7 over.
Ïa ka nam Man of the Match la ïoh da u Namewanki Pakyntein naka (Young Lads CC).
Ha kawei pat ka jingïalehkai ha Wahiajer Mini Stadium, ka PCC Phramer ka la pynliem ïa ka Tympang CC da 48 run.
Ka Tympang CC kala jop ïa ka jingkynting pisa bad ka la jied ban kawang bol nyngkong. Ka PCC Phramer kaba la tied nyngkong ka la kamai 131 run ha ki 17.3 over shuwa ban shah pynhap lut baroh ki wicket.U Alki Sari u la tied 32 run na ki 19 bol (1 ka 6 bad 4 tylli ki 4), katba u Ram Ksoo u la kamai 16 run.
Na ka liang ki nongkawang bol ka Tympang CC, u Paul Andy Passah ula khur 4 wicket na ki 6 over, katba u Iahchwa Lamin bad u Damonmitre Phawa ki la ïoh mar 2 wicket.
Ha ka jingïalehkai kaba ar, ka Tympang CC ka la kamai tang 83 run ha ki 23.4 over bad shah pynhap lut baroh ki wicket. U Manhame Lyngdoh u la long uba kamai bun eh da 17 run.
Na ka liang ki nongkawang bol ka PCC Phramer, u Melan Suchiang u la khur 5 wicket ha ki 5.4 over, katba u Ram Ksoo bad u Romewel Ymbon ki la ïoh mar 2 wicket.
Ïa ka nam Man of the Match la ïoh da u Melan Suchiang naka (PCC Phramer).
Ki jingïalehkai lashai ka 20 tarik u Lber 2026 kin long hapdeng ka Khimusniang SC pyrshah ïa ka Ummulong SC – Khliehtyrchi Mini Stadium, katba ka Wahiajer SC pyrshah ïa ka Dulong CC – Wahiajer Mini Stadium haka por 9 baje mynstep.
