Ka Klob North East United FC kaba dei ruh ka lahduh (Champion) jong u snem ba lah dep (2024-2025) ka la ioh ia ka kabu ban rah biang ia ka nam lahduh jong ka lympung Durand Cup kaba 134 lyngba ka jinglah ban pynliem ia ka Diamond Harbour FC da 6-1 kol ha ka jingiakhun kaba la pynlong ha madan Vivekananda Yuba Bharati, Kolkata.
Ka Diamond kaba dei ka klob na West Bengal, Kolkata ka ioh kabu shibun ban ïalehkai ha kane ka sngi namar ka la ioh ban ïakhun ha la ïing hynrei namar ka jingtbit jong ka North East, la khanglad noh ia ka jingangnud jong ki ban rah ia ka nam lahduh.
Ia kitei ki kol na ka bynta ka Northeast la ioh ban thep lyngba u Asheer Akhtar ha ka minit ba 30, u Pathib Gogoi ha ka minit ba 45+1, u Thoi ha ka minit ba 50, u Jairo ha ka minit ba 81, u Andy ha ka minit ba 86 bad u Alaaeddine Ajaraie ha ka minit ba 90+3.
Watla ka Diamond ka la liem ha katei ka jingiakhun, kane ka klob kaba dang shu ioh ban ïashim bynta ha kane ka lympung kaba la rim tam ha ka dewbah Asia ha ka sien ba nyngkong, hynrei ka la ioh shibun ka jingiaroh na kiba bun namar ka la lah ban poi haduh ka final jong kane ka lympung kaba heh bad kaba don ia ki klob kiba khlaiñ bad kiba la don bynta ha ka lympung Indian Super League (ISL).
U Alaaeddine Ajaraie (NorthEast United) u la ioh ban khur ia ka khusnam golden boot ha une u snem lyngba ka jingioh ban thep haduh 8 kol na 6 tylli ki jingialehkai.
